21-noyabr, payshanba kuni O‘zbekiston Oliy Majlisi Senati raisi Tanzila Norboyevaning Rossiya federal majlisi federatsiyasi Kengashi raisi Valentina Matviyenko bilan uchrashuvi bo‘lib o‘tdi, deb xabar beradi O‘zbekiston Oliy Majlisi Senati axborot xizmati.
Uchrashuv Sankt-Peterburg shahrida Mustaqil Davlatlar Hamdo‘stligining ishtirokchi davlatlari Parlamentlararo assambleyasi 50-yalpi majlisi doirasida o‘tkazildi.
Muloqot chog‘ida O‘zbekiston—Rossiya parlamentlararo hamkorligining hozirgi holati va uni yanada rivojlantirish istiqbollari muhokama etildi.
Valentina Matviyenko O‘zbekiston delegatsiyasini qutlar ekan, joriy yil oktabr oyida O‘zbekistonga amalga oshirgan tashrifi unda yorqin taassurot qoldirganini aytib o‘tdi. Prezident Shavkat Mirziyoyev rahbarligida respublikada tarixan qisqa vaqtda amalga oshirilgan islohotlarga yuksak baho berildi.
Federatsiya kengashi raisining so‘zlariga ko‘ra, Rossiyada 2019-yil 22-dekabr kuni bo‘lib o‘tadigan O‘zbekiston Oliy Majlisi Qonunchilik palatasi va mahalliy kengashlar deputatlari sayloviga ko‘rilayotgan tayyorgarlik katta qiziqish bilan kuzatilmoqda. Spikerning aytishicha, Rossiya tomoni O‘zbekistonda saylov tizimini takomillashtirishga qaratilgan chora-tadbirlarni va bu yo‘nalishda qabul qilinayotgan qonun hujjatlarini qo‘llab-quvvatlaydi. Bo‘lajak saylovning borishini kuzatish uchun respublikaga Rossiya va MDH PAning nufuzli delegatsiyasi tashrif buyurishi aytib o‘tildi. Ovoz berish jarayoni yuqori darajada o‘tishiga ishonch bildirildi.
Valentina Matviyenkoning ta’kidlashicha, Rossiyada O‘zbekiston Prezidenti Shavkat Mirziyoyevning 2020-yil fevralda Rossiyaga amalga oshiradigan tashrifiga puxta tayyorgarlik ko‘rilmoqda. Bu tashrif ikki tomonlama munosabatlar sifat jihatidan yangi darajaga ko‘tarilishiga xizmat qiladi.
Federatsiya kengashi O‘zbekiston rahbarining Rossiyaga tashrifi dasturini parlamentga doir masalalar bilan boyitishga o‘z hissasini qo‘shishi ta’kidlandi. Rossiya tomoni tashrif arafasida Rossiya federal majlisi federatsiyasi kengashi va O‘zbekiston Oliy Majlisi Senati o‘rtasidagi hamkorlik bo‘yicha parlamentlararo komissiyaning navbatdagi majlisini o‘tkazish to‘g‘risidagi O‘zbekiston tomonining taklifini qo‘llab-quvvatladi.
Izoh (0)