Ijtimoiy tarmoqlarda Qarshi shahrida joylashgan “Jurnalistlar uyi” binosi achinarli ahvolga tushib qolgani haqida ma’lumot tarqaldi.
Qashqadaryo viloyati axborot xizmatining xabar berishicha, ushbu ma’lumot viloyat hokimi vazifasini bajaruvchi Zoir Mirzayevga yetkazilgan.
Bu masalada viloyat hokimi joriy yilning 18-noyabr kuni mas’ullar bilan yig‘ilish o‘tkazib, tegishli topshiriqlarni bergan.
Jumladan, viloyat hokimi o‘rinbosari S.Azizov va viloyat moliya boshqarmasi boshlig‘i F.Yusupovga ta’mirlash ishlarini tez orada yakunlash bo‘yicha aniq chora-tadbirlar belgilash, shuningdek, viloyat hokimi o‘rinbosari D.Allayevga qurilish yakuniga yetganidan so‘ng jurnalist va muxbirlarni ochiq va shaffof usulda binoga joylashtirish bo‘yicha viloyat hokimiga taklif kiritishi belgilangan.
Shuningdek, viloyat hokimi yuqoridagi masala bo‘yicha Axborot va ommaviy kommunikatsiyalar agentligining viloyat boshqarmasi boshlig‘i U.Nusurov bilan ham uchrashib, muammoni hal etish uchun harakat qilayotganligini, viloyatning jurnalist va ijodkorlari uchun munosib shart-sharoitlar yaratib berish bo‘yicha bir qator rejalari borligini ham ma’lum qilgan.
Viloyat hokimi o‘rinbosari S.Azizovning ma’lum qilishicha, binoga hozirgacha 1 milliard 300 million so‘m sarflangan. Ammo, ta’mirlash ishlarini yakunlash uchun yana qo‘shimcha mablag‘ zarur. Ushbu mablag‘ masalasi hal etilishi bilan ta’mirlash ishlari boshlab yuboriladi.
Axborot va ommaviy kommunikatsiyalar agentligi direktori o‘rinbosari Saida Mirziyoyeva “Jurnalistlar uyi”ning tez orada ta’mirlab, foydalanishga topshirilishiga umid bildirdi.
“Achinarli ahvolga tushib qolgan Qashqadaryo viloyati ‘Jurnalistlar uyi’ binosi, umid qilamizki, Qashqadaryo viloyati hokimligi tomonidan tez fursatda bartaraf etiladi. Biz ham uning foydalanishga topshirish marosimida ishtirok etib, bahonada viloyat jurnalist va blogerlari bilan uchrashishga tayyormiz”, — deb yozadi Saida Mirziyoyeva.
Izoh (0)