21 ноябрь, пайшанба куни Ўзбекистон Олий Мажлиси Сенати раиси Танзила Норбоеванинг Россия федерал мажлиси федерацияси Кенгаши раиси Валентина Матвиенко билан учрашуви бўлиб ўтди, деб хабар беради Ўзбекистон Олий Мажлиси Сенати ахборот хизмати.
Учрашув Санкт-Петербург шаҳрида Мустақил Давлатлар Ҳамдўстлигининг иштирокчи давлатлари Парламентлараро ассамблеяси 50-ялпи мажлиси доирасида ўтказилди.
Мулоқот чоғида Ўзбекистон—Россия парламентлараро ҳамкорлигининг ҳозирги ҳолати ва уни янада ривожлантириш истиқболлари муҳокама этилди.
Валентина Матвиенко Ўзбекистон делегациясини қутлар экан, жорий йил октябрь ойида Ўзбекистонга амалга оширган ташрифи унда ёрқин таассурот қолдирганини айтиб ўтди. Президент Шавкат Мирзиёев раҳбарлигида республикада тарихан қисқа вақтда амалга оширилган ислоҳотларга юксак баҳо берилди.
Федерация кенгаши раисининг сўзларига кўра, Россияда 2019 йил 22 декабрь куни бўлиб ўтадиган Ўзбекистон Олий Мажлиси Қонунчилик палатаси ва маҳаллий кенгашлар депутатлари сайловига кўрилаётган тайёргарлик катта қизиқиш билан кузатилмоқда. Спикернинг айтишича, Россия томони Ўзбекистонда сайлов тизимини такомиллаштиришга қаратилган чора-тадбирларни ва бу йўналишда қабул қилинаётган қонун ҳужжатларини қўллаб-қувватлайди. Бўлажак сайловнинг боришини кузатиш учун республикага Россия ва МДҲ ПАнинг нуфузли делегацияси ташриф буюриши айтиб ўтилди. Овоз бериш жараёни юқори даражада ўтишига ишонч билдирилди.
Валентина Матвиенконинг таъкидлашича, Россияда Ўзбекистон Президенти Шавкат Мирзиёевнинг 2020 йил февралда Россияга амалга оширадиган ташрифига пухта тайёргарлик кўрилмоқда. Бу ташриф икки томонлама муносабатлар сифат жиҳатидан янги даражага кўтарилишига хизмат қилади.
Федерация кенгаши Ўзбекистон раҳбарининг Россияга ташрифи дастурини парламентга доир масалалар билан бойитишга ўз ҳиссасини қўшиши таъкидланди. Россия томони ташриф арафасида Россия федерал мажлиси федерацияси кенгаши ва Ўзбекистон Олий Мажлиси Сенати ўртасидаги ҳамкорлик бўйича парламентлараро комиссиянинг навбатдаги мажлисини ўтказиш тўғрисидаги Ўзбекистон томонининг таклифини қўллаб-қувватлади.
Изоҳ (0)