Ilgari davlat budjetini parlamentda tasdiqlash ko‘proq rasmiy xarakterga ega bo‘lgan bo‘lsa, bu safar muhokamalar amaliy ruhda kechdi. Buni deputatlar tomonidan ko‘tarilgan savollar hamda bildirilgan takliflar “2020-yil uchun O‘zbekiston Respublikasining Davlat budjeti to‘g‘risida”gi qonunning ikkinchi o‘qishga kiritilgan matnida aks etgani bilan izohlash mumkin. Bu haqda Qonunchilik palatasi matbuot xizmati ma’lum qildi.
Xususan, Qonunchilik palatasi deputati Abdurashid Abduqodirov qonun loyihasining birinchi o‘qishdagi muhokamalari chog‘ida yangi joriy etilgan Soliq konsepsiyasida budjet tashkilotlariga yagona ijtimoiy to‘lov stavkasi 25 foiz, xususiy sektor uchun 12 foiz etib belgilanganini ta’kidlar ekan, oliy ta’lim muassasalari ham soliq to‘lovchi sifatida yagona ijtimoiy to‘lov stavkasining 25 foizida to‘lab kelayotganini aytgandi.
Deputatning so‘zlariga ko‘ra, oliy ta’lim muassasalarining qariyb 70 foiz, ba’zilarining esa 95 foiz xarajatlari kontrakt to‘lovlari mablag‘lari hisobidan shakllanadi. Shu sababli mazkur mablag‘lar xalq to‘lagan puldan ushlanishi e’tiborga olinadigan bo‘lsa, oliy ta’lim muassasalarining yagona ijtimoiy to‘lov stavkasi 12 foizga tushirilishi lozim.
Deputat tomonidan ko‘tarilgan ushbu masala Qonunchilik palatasida Moliya, Oliy va o‘rta maxsus ta’limi vazirliklari hamda boshqa mutasaddi vazirlik xodimlari ishtirokida “2020-yil uchun O‘zbekiston Respublikasining Davlat budjeti to‘g‘risida”gi qonun loyihasini ikkinchi o‘qishga tayyorlash jarayonida atroflicha o‘rganib chiqildi. Shundan so‘ng oliy ta’lim muassasalarida o‘zini o‘zi moliyalashtirish tizimi joriy etilishining natijalariga qarab ularda yagona ijtimoiy to‘lov miqdori 12 foiz etib belgilanadigan bo‘ldi.
Shu o‘rinda yana bir mulohaza tug‘ilishi tabiiy: oliy ta’lim muassasalarida o‘zini o‘zi moliyalashtirish tizimi joriy etilishining natijalariga qarab ularda yagona ijtimoiy to‘lov miqdorining tushirilishi davlat soliq g‘aznasiga tushumlarning kamayishiga olib kelmaydimi? Hukumat va Moliya vazirligi nega bu taklifni osonlikcha qabul qildi?
“Nazarimizda, tanganing ikki tomoni bo‘lgani kabi bunday muhim masalani ham har taraflama chuqur o‘ylab ko‘rmoq foydadan holi emas. Biroq har ne bo‘lganda ham deputat talabi bilan o‘zini o‘zi moliyalashtirish natijalariga ko‘ra, oliy o‘quv yurtlari uchun yagona ijtimoiy to‘lov miqdori 12 foiz etib belgilanganini parlament a’zolarining amaliy yutuqlaridan biri sifatida qabul qilsak arziydi”, — deyiladi xabarda.
Izoh (0)