Prezident qarori bilan Yadro fizikasi instituti faoliyatining asosiy yo‘nalishlari belgilandi

O‘zbekiston Prezidenti “Yadro fizikasi instituti ilmiy-tadqiqot faoliyatini qo‘llab-quvvatlash chora-tadbirlari to‘g‘risida”gi qarorni imzoladi, deb xabar beradi O‘zA.

Institut o‘zining 60 yildan ziyod faoliyati davomida yadro fizikasi va yadroviy texnologiyalar sohasida dunyo ilmiy hamjamiyati tomonidan tan olingan yirik tadqiqot markaziga aylandi.

Quyidagilar institut faoliyatining asosiy yo‘nalishlari etib belgilandi:

• nazariy va eksperimental yadro fizikasi, atom energetikasi va yadroviy texnologiyalar, qattiq jism radiatsion fizikasi va materialshunoslik, yadroviy analitika va radiokimyo, ilmiy asbobsozlik bo‘yicha fundamental, amaliy va innovatsion ilmiy tadqiqotlar olib borish va ilmiy-innovatsion ishlanmalarni amaliyotga tatbiq qilish;
• oliy o‘quv yurtidan keyingi ta’lim instituti faoliyati samaradorligini ta’minlash, yuqori malakali kadrlar tayyorlash va iqtidorli yoshlarni har tomonlama qo‘llab-quvvatlash;
• respublika maqsadli fan-texnika va innovatsion dasturlarini bajarish orqali yadro fani va texnologiyalarini muvofiqlashtirishda faol ishtirok etish;
• iqtisodiyotning real sektori tarmoqlari, ta’lim muassasalaridagi o‘quv jarayonida institut ilmiy salohiyatidan samarali foydalanish, dissertatsiya ishlari va bitiruv malakaviy ishlariga rahbarlik qilish orqali fan, ta’lim va ishlab chiqarish integratsiyasini mustahkamlash;
• xorijda ilmiy kadrlarning kasbiy malakasini oshirish, shuningdek, institut ilmiy faoliyatiga chet ellik olimlar va mutaxassislarni, shu jumladan, xorijdagi vatandoshlarni jalb qilish;
• Institut faoliyatiga zamonaviy axborot texnologiyalarini keng joriy etish.

Belgilab qo‘yilishicha, 2020-yilning 1-yanvaridan boshlab:

• Institut xodimlari mehnatiga haq to‘lash, bino va inshootlarini saqlash xarajatlarini moliyalashtirish, shuningdek, joriy xarajatlarini qoplash Davlat budjeti mablag‘lari hisobiga amalga oshiriladi;
• Institutda ilmiy-texnik dasturlar doirasidagi fundamental tadqiqotlarning amalga oshirilishi to‘xtatiladi va bo‘shagan byudjet mablag‘lari institutni saqlash xarajatlarining moliyalashtirilishiga yo‘naltiriladi.

Institut faoliyatini moliyalashtirish manbalari etib quyidagilar belgilandi:

• O‘zbekiston Davlat budjeti mablag‘lari;
• xalqaro moliya va boshqa institutlar, xorijiy tashkilotlarning grantlari;
• xo‘jalik faoliyati hisobidan tushgan mablag‘lar;
• qonun hujjatlarida taqiqlanmagan boshqa manbalar.

O‘zbekiston Fanlar akademiyasi va Innovatsion rivojlanish vazirligi manfaatdor idoralar bilan birgalikda bir oy muddatda institutni 2020—2024-yillarda rivojlanish konsepsiyasini, ikki oy muddatda 2030-yilgacha institutning ilmiy izlanish faoliyatini rivojlantirish konsepsiyasini ishlab chiqish va tasdiqlash uchun Fan va texnologiyalar bo‘yicha respublika kengashiga kiritish lozimligi belgilandi.Eslatib o‘tamiz, 2019-yil sentabrdan Toshkentda “Moskva muhandislik-fizika instituti” milliy tadqiqot yadro universiteti (MMFI MTYaU) filiali ish boshladi.