Jinoyat ishlari bo‘yicha Buvayda tuman sudi tomonidan tuman elektr ta’minoti korxonasi bosh hisobchisi A.Rahmonovga nisbatan sud hukmi e’lon qilindi. Unga ko‘ra, A.Rahmonov O‘zbekiston Respublikasi JKning 167-moddasi 3-qismi “g” bandi va 209-moddasi 1-qismi bilan aybdor deb topilgan. Bu haqda “Daryo”ga MIB matbuot xizmati ma’lum qildi.
Jinoyat ishi hujjatlariga ko‘ra, A.Rahmonov 2016-yil 1-dekabrdan 2018-yil 1-iyunga qadar Buvayda tumani elektr ta’minoti korxonasida bosh hisobchi lavozimida ishlab kelgan. Mansab mavqeini suiiste’mol qilib, o‘ziga biriktirilgan “elektron kalit” orqali tumandagi 45 nafar iste’molchining elektr energiyasi uchun to‘lagan naqd pul shaklidagi jami 27 million 489,4 ming so‘m mablag‘ini qabul qilib olib, uning o‘rniga 44 nafar iste’molchining elektr energiyasi uchun to‘lagan, yillar davomida to‘planib qolgan pul mablag‘larini boshqa 45 nafar iste’molchilarning hisob-raqamlariga yo‘naltirish orqali qoplab, pul mablag‘larini o‘z ehtiyojlari uchun ishlatib yuborib, o‘zlashtirish yo‘li bilan talon-toroj qilgan.
Bundan tashqari, jinoiy harakatlariga qonuniy tus berish maqsadida fuqarolar hisob raqamidagi pul mablag‘larini boshqa fuqaro hisob raqamiga o‘tkazilishini so‘rab murojaat qilganligi ko‘rsatilgan arizalarni qalbakilashtirib, fuqarolarning huquqlari va qonun bilan qo‘riqlanadigan manfaatlariga jiddiy zarar yetkazgan.
A.Rahmonov sudda aybiga to‘liq iqror bo‘lib ko‘rsatmalar berdi. Unga nisbatan sud bir yil muddatga mansabdorlik lavozimlari va moddiy javobgarlik yuklatilgan vazifalarda ishlash huquqidan mahrum qilib, ish haqining yigirma foizi miqdorini davlat daromadi hisobiga ushlab qolgan holda ikki yil olti oy muddatga axloq tuzatish ishlari jazosi tayinladi.
Aybdor davlat manfaatlariga yetkazilgan 27 489 000 so‘m zararni to‘liq to‘lashiga to‘g‘ri keldi.
Izoh (0)