Ijtimoiy tarmoqlarda Toshkent shahar Bektemir tumanidagi 293-sonli umumta’lim maktabi oshxonasiga notanish ayol kirgani va o‘quvchilarga choy ichishni taklif qilgani haqida xabarlar tarqaldi. Toshkent shahar Xalq ta’limi boshqarmasi mazkur holat bo‘yicha ma’lumot berdi.
Xabar berilishicha, joriy yilning 16-noyabr kuni soat taxminan 15:30 da maktabga jiyanini olib ketish uchun kelganini aytgan noma’lum ayol maktab navbatchisidan kun sovuq bo‘lgani uchun maktab oshxonasidan issiq choy olib ichishga ruxsat so‘ragan. Oshxonaga kirgan ayol u yerda o‘tirgan 5 va 6-sinf o‘quvchilariga oshxonadan olgan o‘zi ichib o‘tirgan choydan ichishni taklif etgan.
Shu vaqt oralig‘ida darsga qo‘ng‘iroq chalingan va bolalar darsga biroz kech qolgan. Holatga aniqlik kiritish uchun sinf rahbari N.Ansarova oshxonaga tushgan va o‘quvchilar atrofida bo‘lgan notanish ayol haqida maktab rahbari N.Tojiboyevani ogohlantirgan. Maktab rahbari N.Tojiboyeva shu zahoti oshxonaga tushib, notanish ayol bilan savol-javob o‘tkazib, berilgan savollarga aniq javob bera olmagan fuqaro bo‘yicha darhol tuman IIB xodimlariga xabar qilgan.
Maktabga kelgan tuman IIB xodimlari fuqaroni tezkorlik bilan suhbatga tortib, unga tegishli bo‘lgan sumka va kiyimlarini tekshirgan. Tekshiruv natijasida, ayolning qo‘lidagi sumkada ukol olish uchun olingan shprits borligi aniqlangan. Ayol shpritsni o‘quvchilarga ko‘rsatmagan va o‘quvchilarning sog‘lig‘iga zarar yetkazadigan hech qanday xatti-harakat qilmagani ma’lum bo‘lgan.
Shuningdek, tuman IIB xodimlari tomonidan surishtiruv olib borilganda ushbu fuqaro 1996-yilda tug‘ilgan Kaunbayeva Mahliyo Azimjon qizi bo‘lib chiqqan. U Toshkent viloyati Olmaliq shahar IIBda bedarak yo‘qolganlar ro‘yxatida ekanligi va ruhiy xastaligi borligi ma’lum bo‘lgan.
IIB tomonidan ayolning yashash joyi aniqlanib, u onasi Muhabbat Miramitova va Olmaliq shahar IIB xodimlariga topshirilgan.
Fuqaroning onasi farzandining sog‘lig‘ida muammo borligini, lekin hech kimga zarari tegmasligini tasdiqlab, maktabga adashib kelib qolganligini ma’lum qilgan.
Izoh (0)