Президент қарори билан Ядро физикаси институти фаолиятининг асосий йўналишлари белгиланди

Ўзбекистон Президенти «Ядро физикаси институти илмий-тадқиқот фаолиятини қўллаб-қувватлаш чора-тадбирлари тўғрисида»ги қарорни имзолади, деб хабар беради ЎзА.

Институт ўзининг 60 йилдан зиёд фаолияти давомида ядро физикаси ва ядровий технологиялар соҳасида дунё илмий ҳамжамияти томонидан тан олинган йирик тадқиқот марказига айланди.

Қуйидагилар институт фаолиятининг асосий йўналишлари этиб белгиланди:

• назарий ва экспериментал ядро физикаси, атом энергетикаси ва ядровий технологиялар, қаттиқ жисм радиацион физикаси ва материалшунослик, ядровий аналитика ва радиокимё, илмий асбобсозлик бўйича фундаментал, амалий ва инновацион илмий тадқиқотлар олиб бориш ва илмий-инновацион ишланмаларни амалиётга татбиқ қилиш;
• олий ўқув юртидан кейинги таълим институти фаолияти самарадорлигини таъминлаш, юқори малакали кадрлар тайёрлаш ва иқтидорли ёшларни ҳар томонлама қўллаб-қувватлаш;
• республика мақсадли фан-техника ва инновацион дастурларини бажариш орқали ядро фани ва технологияларини мувофиқлаштиришда фаол иштирок этиш;
• иқтисодиётнинг реал сектори тармоқлари, таълим муассасаларидаги ўқув жараёнида институт илмий салоҳиятидан самарали фойдаланиш, диссертация ишлари ва битирув малакавий ишларига раҳбарлик қилиш орқали фан, таълим ва ишлаб чиқариш интеграциясини мустаҳкамлаш;
• хорижда илмий кадрларнинг касбий малакасини ошириш, шунингдек, институт илмий фаолиятига чет эллик олимлар ва мутахассисларни, шу жумладан, хориждаги ватандошларни жалб қилиш;
• Институт фаолиятига замонавий ахборот технологияларини кенг жорий этиш.

Белгилаб қўйилишича, 2020 йилнинг 1 январидан бошлаб:

• Институт ходимлари меҳнатига ҳақ тўлаш, бино ва иншоотларини сақлаш харажатларини молиялаштириш, шунингдек, жорий харажатларини қоплаш Давлат бюджети маблағлари ҳисобига амалга оширилади;
• Институтда илмий-техник дастурлар доирасидаги фундаментал тадқиқотларнинг амалга оширилиши тўхтатилади ва бўшаган бюджет маблағлари институтни сақлаш харажатларининг молиялаштирилишига йўналтирилади.

Институт фаолиятини молиялаштириш манбалари этиб қуйидагилар белгиланди:

• Ўзбекистон Давлат бюджети маблағлари;
• халқаро молия ва бошқа институтлар, хорижий ташкилотларнинг грантлари;
• хўжалик фаолияти ҳисобидан тушган маблағлар;
• қонун ҳужжатларида тақиқланмаган бошқа манбалар.

Ўзбекистон Фанлар академияси ва Инновацион ривожланиш вазирлиги манфаатдор идоралар билан биргаликда бир ой муддатда институтни 2020—2024 йилларда ривожланиш концепциясини, икки ой муддатда 2030 йилгача институтнинг илмий изланиш фаолиятини ривожлантириш концепциясини ишлаб чиқиш ва тасдиқлаш учун Фан ва технологиялар бўйича республика кенгашига киритиш лозимлиги белгиланди.Эслатиб ўтамиз, 2019 йил сентябрдан Тошкентда «Москва муҳандислик-физика институти» миллий тадқиқот ядро университети (ММФИ МТЯУ) филиали иш бошлади.