Qashqadaryo viloyati xalq ta’limi boshqarmasi Nishon tumanidagi 2-umumiy o‘rta ta’lim maktabi faoliyatiga doir “Nishonda bir maktab ikkiga bo‘lingan. Ayrim sinflarga ‘omborxona’da dars o‘tiladi” maqolasi yuzasidan surishtiruv ishlarini olib bordi.
Ishchi guruh a’zolari tomonidan vaziyat o‘rganilgan va tegishli chora-tadbirlar ishlab chiqilgan.
“Maktabda o‘quv sinflarida 2 navbatda to‘liq o‘qitilib kelinayotganligi sababli ayrim sinflar maktabning eski binosida ta’lim olishlariga to‘g‘ri keladi. Maktabga qo‘shimcha bino qurib berish uchun 2020-yil tuman ‘Obod qishloq’ dasturiga 210 o‘rinli qo‘shimcha bino qurish uchun takliflar berilgan.
Tuman xalq ta’limi bo‘limiga qarashli 38 ta umumiy o‘rta ta’lim maktablari uchun 308 930 000 so‘mlik o‘quvchilar parta stullari kuzgi ta’til davrida 2-umumiy o‘rta ta’lim maktabining eski binosiga vaqtincha olib kelinib, bir kun muddatda barcha maktablarga yetkazib berildi. Tasvirda ko‘rsatilgan o‘quvchilar parta stullari yig‘ib qo‘yilgan xona omborxona emas, sinfxona sifatida foydalanib kelinmoqda.
Shuningdek, maktabning tashqi ko‘rinishi tuman xalq ta’limi bo‘limi huzuridagi qurilish ekspluatatsiya bo‘limi tomonidan ta’mirlanib, amaliy yordam ko‘rsatildi”, — deyiladi xabarda.
Nishon tumanidagi 2-umumiy o‘rta ta’lim maktabining 2 ta o‘quv binosi mavjud bo‘lib, birinchi binosi 1958-yilda qurilgan, quvvati 210 o‘rinli va sport zali mavjud. Ikkinchi bino esa 2007-yilda investitsiya dasturi asosida qurilgan bo‘lib, quvvati 315 o‘ringa mo‘ljallangan. Joriy o‘quv yilida 705 nafar o‘quvchilar ta’lim-tarbiya olib kelmoqda.
Izoh (0)