Futbol bo‘yicha O‘zbekiston terma jamoasi 19-noyabr, seshanba kuni JCh—2022 saralashining ikkinchi bosqichi 6-turi doirasida Falastinga qarshi o‘yin o‘tkazib, 2:0 hisobida g‘alaba qozondi.
Uchrashuvdan so‘ng terma jamoa ustozi Vadim Abramov jurnalistlar savollariga javob qaytardi, deb xabar beradi “Daryo” muxbiri.
O‘yin haqida— Hammani g‘alaba bilan tabriklashni xohlardim. O‘yin muxlislarga zavq bag‘ishladi deb o‘ylayman. Bir necha kun oldin Saudiyadan qabul qilingan mag‘lubiyatdan so‘ng qiyin bo‘lishi tabiiy edi. Yigitlar bu vaziyatdan chiqib keta olganidan xursandman. Buning uchun ularga rahmat. O‘yin borasida gapirsak, butun bahs davomida biz uning borishini nazorat qildik. Yaxshi o‘yin ko‘rsatdik deb o‘ylayman.
Futbolchilarning 70-daqiqalardan so‘ng charchab qolayotgani haqida
— Gap shundaki to‘pni nazorat qilishimiz kerak edi. Ammo futbolchilarimiz hali to‘pni nazorat qilish deganda raqib maydonida bo‘lishini oxirigacha tushunib yetganicha yo‘q. Biz bu xatolarga e’tibor qaratganmiz, gapirganmiz. Biroq Moskva ham tezda qurilmagan. To‘g‘irlashga harakat qilamiz. To‘pni nazorat qilish — raqib maydonida kechishi kerak.
Oleg Zoteyev va Odil Ahmedov bugungi o‘yini haqida
— Ikkalasi ham o‘z pozitsiyasida yaxshi o‘yin namoyish etdi. Vaqt ko‘rsatadi: agarda himoyamiz yaxshi o‘ynayversa, Ahmedov o‘z pozitsiyasida harakat qiladi.
Maydon markazidagi to‘p uzatishlarda xatolarga yo‘l qo‘yilganligi haqida
Raqibdan kelib chiqqan holda o‘yin bo‘ladi. Raqib qanchalik imkon bersa, yigitlar shunchalik hujumkor o‘ynashi haqida ham avval ta’kidlagandim. Albatta, kamchiliklar bo‘ldi. Qayerdadir so‘nggi uzatmalar o‘tmadi. Yigitlar esa hisobdan kelib chiqib o‘ynadi.
Yaponiyani safarda yutgani va buning Saudiya Arabistoniga qarshi takorlash imkoniyati haqida
— Yaponiyaga qarshi bahsda men boshqa holatda edim. Axir o‘shanda men terma jamoa bilan 1,5 yil ishlab qo‘ygandim. O‘yin ham Osiyo Kubogidan keyin kechgandi. Olimpiya terma jamoasini ham boshqaradim. Tanlov imkoniyat juda katta bo‘lgandi. Barcha o‘yinchilar bilan ham yaxshi tanish edim. Hozir esa umuman boshqa vaziyat. Agar optimal formaga kira olsak, bu davr ichida barchasi o‘zgarishi mumkin. Terma jamoa a’zolari klublardan kelishadi, o‘sha o‘yinga yaqin futbolchilar qanday jismoniy holatda bo‘lishini ko‘rish kerak bo‘ladi. Saudiyaga qarshi Toshkentdagi o‘yinni hisobga olsak, biz ayni damda hech bir jabhada ulardan ortda emasmiz. To‘g‘ri, u yerda issiq bo‘ladi, ammo Saudiya Arabistoni terma jamoasi a’zolari ham “protivogaz” bilan o‘ynamasa kerak.
Terma jamoaning oldindagi rejalari haqida
— Mart oyida Qozog‘iston bilan o‘rtoqlik o‘yini o‘tkazish borasida kelishuv bor. Janubiy Koreya Braziliya bilan, Saudiya Arabistoni Paragvay bilan o‘ynamoqda. Biz ham shunday darajadagi jamoalarga qarshi o‘ynashni istardik. Qishda futbolchilarni yig‘inma-yig‘in olib yurishni istamaymiz.
Izoh (0)