Футбол бўйича Ўзбекистон терма жамоаси 19 ноябрь, сешанба куни ЖЧ—2022 саралашининг иккинчи босқичи 6-тури доирасида Фаластинга қарши ўйин ўтказиб, 2:0 ҳисобида ғалаба қозонди.
Учрашувдан сўнг терма жамоа устози Вадим Абрамов журналистлар саволларига жавоб қайтарди, деб хабар беради «Дарё» мухбири.
Ўйин ҳақида— Ҳаммани ғалаба билан табриклашни хоҳлардим. Ўйин мухлисларга завқ бағишлади деб ўйлайман. Бир неча кун олдин Саудиядан қабул қилинган мағлубиятдан сўнг қийин бўлиши табиий эди. Йигитлар бу вазиятдан чиқиб кета олганидан хурсандман. Бунинг учун уларга раҳмат. Ўйин борасида гапирсак, бутун баҳс давомида биз унинг боришини назорат қилдик. Яхши ўйин кўрсатдик деб ўйлайман.
Футболчиларнинг 70-дақиқалардан сўнг чарчаб қолаётгани ҳақида
— Гап шундаки тўпни назорат қилишимиз керак эди. Аммо футболчиларимиз ҳали тўпни назорат қилиш деганда рақиб майдонида бўлишини охиригача тушуниб етганича йўқ. Биз бу хатоларга эътибор қаратганмиз, гапирганмиз. Бироқ Москва ҳам тезда қурилмаган. Тўғирлашга ҳаракат қиламиз. Тўпни назорат қилиш — рақиб майдонида кечиши керак.
Олег Зотеев ва Одил Аҳмедов бугунги ўйини ҳақида
— Иккаласи ҳам ўз позициясида яхши ўйин намойиш этди. Вақт кўрсатади: агарда ҳимоямиз яхши ўйнайверса, Аҳмедов ўз позициясида ҳаракат қилади.
Майдон марказидаги тўп узатишларда хатоларга йўл қўйилганлиги ҳақида
Рақибдан келиб чиққан ҳолда ўйин бўлади. Рақиб қанчалик имкон берса, йигитлар шунчалик ҳужумкор ўйнаши ҳақида ҳам аввал таъкидлагандим. Албатта, камчиликлар бўлди. Қаердадир сўнгги узатмалар ўтмади. Йигитлар эса ҳисобдан келиб чиқиб ўйнади.
Японияни сафарда ютгани ва бунинг Саудия Арабистонига қарши такорлаш имконияти ҳақида
— Японияга қарши баҳсда мен бошқа ҳолатда эдим. Ахир ўшанда мен терма жамоа билан 1,5 йил ишлаб қўйгандим. Ўйин ҳам Осиё Кубогидан кейин кечганди. Олимпия терма жамоасини ҳам бошқарадим. Танлов имконият жуда катта бўлганди. Барча ўйинчилар билан ҳам яхши таниш эдим. Ҳозир эса умуман бошқа вазият. Агар оптимал формага кира олсак, бу давр ичида барчаси ўзгариши мумкин. Терма жамоа аъзолари клублардан келишади, ўша ўйинга яқин футболчилар қандай жисмоний ҳолатда бўлишини кўриш керак бўлади. Саудияга қарши Тошкентдаги ўйинни ҳисобга олсак, биз айни дамда ҳеч бир жабҳада улардан ортда эмасмиз. Тўғри, у ерда иссиқ бўлади, аммо Саудия Арабистони терма жамоаси аъзолари ҳам «противогаз» билан ўйнамаса керак.
Терма жамоанинг олдиндаги режалари ҳақида
— Март ойида Қозоғистон билан ўртоқлик ўйини ўтказиш борасида келишув бор. Жанубий Корея Бразилия билан, Саудия Арабистони Парагвай билан ўйнамоқда. Биз ҳам шундай даражадаги жамоаларга қарши ўйнашни истардик. Қишда футболчиларни йиғинма-йиғин олиб юришни истамаймиз.
Изоҳ (0)