“Neft va gazgeologiya-qidiruv ishlarini tashkil etish va olib borish tizimini takomillashtirish chora-tadbirlari to‘g‘risida”gi Prezident qarori qabul qilindi, deb xabar bermoqda “Huquqiy axborot” kanali.
Qaror bilan Davlat geologiya va mineral resurslar qo‘mitasiga yangi uglevodorod xomashyosi konlarini ochish uchun neft va gaz istiqbolli tuzilmalarini aniqlash va tayyorlashga qaratilgan ilmiy-tadqiqot, regional geologik-tasvirlash, geofizik va burg‘ulash ishlarini olib borish hamda boshqa qo‘shimcha funksiyalar yuklatildi.
2020-yildan boshlab neft va gaz mineral xomashyo bazasini rivojlantirish va qayta tiklash yillik davlat dasturlari Davlat geologiya va mineral resurslar qo‘mitasi tomonidan tegishli vazirliklar bilan kelishilgan holda ishlab chiqiladi va tasdiqlanadi.
“O‘zbekneftgaz” AJ va “O‘zburg‘uneftgaz” AJning “O‘zbekgeofizika” AJ hamda “Neft va gaz konlari geologiyasi va qidiruvi instituti” AJning ustav kapitallaridagi ulushlari Davlat aktivlarini boshqarish agentligiga o‘tkazildi.
Endilikda yer qa’rini geologik o‘rganish, foydalanish va muhofaza qilish hamda konchilik sohasidagi qonun hujjatlari loyihalari Davlat geologiya va mineral resurslar qo‘mitasi bilan kelishiladi.
Shu bilan birga, Davlat geologiya va mineral resurslar qo‘mitasi raisining neft va gaz geologiya-qidiruv ishlarini o‘tkazish masalalarini muvofiqlashtiruvchi o‘rinbosari lavozimi joriy etilib, qo‘mita tuzilmasida yana yangi uchta boshqarma tashkil etildi.
Izoh (0)