Futbol bo‘yicha O‘zbekiston terma jamoasi 19-noyabr, seshanba kuni JCh—2022 saralashining ikkinchi bosqichi 6-turi doirasida Falastinga qarshi o‘yin o‘tkazib, 2:0 hisobida g‘alaba qozondi.
Uchrashuvdan so‘ng Falastin terma jamoa ustozi Nuriddin Ali jurnalistlar savollariga javob qaytardi, deb xabar beradi “Daryo” muxbiri.
Mavzuga doir: Vadim Abramov: “Biz ham Braziliya, Paragvay kabi terma jamoalar bilan o‘ynashni xohlardik”
O‘zbekistonga qarshi o‘yin haqida— Birinchi navbatda O‘zbekiston terma jamoasini bugungi g‘alaba bilan tabriklayman. Bugun raqib jamoaviy ruh tufayli tashabbusga ega bo‘ldi va g‘alaba qozondi. Tarkibimizda asosiy futbolchilar jarohatlangandi, afsuski, ularning o‘rinini to‘ldiradigan o‘yinchilar yo‘q edi.
Bugungi bahsning o‘tgan o‘yin bilan farqi haqida
— Aytganimdek, tarkibimizda avvalgi o‘yinda ishtirok etgan yetakchilar bugun o‘ynamadi. Bugungi bahsda ular bizga yetishmadi. Shuningdek, jamoaviy ruh avvalgi o‘yinga nisbatan pastroq bo‘ldi.
Falastin so‘nggi daqiqalarda o‘yinni kuchaytirgani haqida
— Raqib 2:0 hisobida oldinda edi va bu vaziyatda bizning oldinga o‘tishimiz tabiiy edi. Keyin o‘zgarishlarning ham o‘rni bo‘ldi, yarim himoyachi o‘rniga hujum tushirdik va ikkita forvard bilan o‘ynadik. Bu esa oldingi chiziqdagi o‘yinimizni kuchaytirdi. Shuningdek, O‘zbekiston terma jamoasi o‘yin tempini tushirishga harakat qildi.
O‘zbekiston va Saudiya Arabistoni terma jamoalari o‘rtasidagi farq
— Bu ikki terma jamoaning o‘yin uslubi har xil. O‘zbekiston terma jamoasi asosan qanotlar orqali hujum qiladi va uzatmalarning ko‘pchilik qismi Eldor Shomurodovga qaratilgan. Saudiya Arabistoni terma jamoasi esa markaz orqali o‘ynaydi va qisqa paslar bilan harakat qiladi. Shogirdlarimga o‘yindan avval Shomurodovdan ehtiyot bo‘lishlari va uni yaxshiroq qo‘riqlashlarini aytagandim. Biroq bu o‘yinchini yetarlicha qo‘riqlay olmadik.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)