«Дарё» томонидан Қашқадарё вилояти Деҳқонобод тумани Яшнобод маҳалласида жойлашган 40-мактабнинг 62 нафар ўқувчи таълим оладиган биносида 43 йилдан бери электр энергияси ўтказилмагани ҳақида хабар берилган эди.
Ушбу мақоладан сўнг «Ҳудудий электр тармоқлари» АЖ томонидан мазкур бинога электр токи ўтказилди. Бу ҳақда акциядорлик жамияти матбуот хизмати томонидан «Дарё»га маълум қилинди.
Ўрганиш натижасида ҳақиқатан ҳам 40-сонли мактабнинг 62 нафар ўқувчиси таҳсил олувчи филиалида электр энергияси йўқлиги, мактаб кўп йиллардан бери шу аҳволда фаолият юритганлиги маълум бўлган.
Вазирлар Маҳкамасининг 2018 йил 12 январдаги «Электр энергияси ва табиий газдан фойдаланиш тартибини такомиллаштиришга доир қўшимча чора-тадбирлар тўғрисида»ги қарорида истеъмолчиларнинг юкламаларини улаш билан боғлиқ янги электр қурилмаларини ва электр тармоғи хўжалигининг объектларини лойиҳалаш ва қуриш, ишлаб турганларини кенгайтириш ва реконструкция қилиш истеъмолчиларнинг маблағлари ҳисобидан амалга оширилиши белгиланган. «Шундай экан, юқорида қайд этилган илм даргоҳи ҳам бундан мустасно эмас», — дейилади компания хабарида.
Қайд этилишича, Деҳқонобод тумани ҳокимлиги, қолаверса Яшнобод маҳалласи фаоллари «Обод қишлоқ» ҳамда «Обод маҳалла» давлат дастурлари ишлаб чиқилишида ўз вақтида бу муаммо борасида таклифларини бермаган.
Деҳқонобод туманида 2019 йилда Ўзбекистон Президентининг 2661-сонли қарори ҳамда «Обод қишлоқ» ва бошқа дастурлар ижроси бўйича 173 дона темир бетон устуни, 43,5 километр электр узатиш тармоқлари ва 14 дона трансформатор пункти реконструкция ва модернизация қилинган.
«Таъкидлаш жоизки, жамиятнинг бу борадаги тезкорлик билан амалга оширган саъй-ҳаракатлари туфайли ушбу масала ижобий ечимини топди. Тез кунларда 43 йил электр энергиясиз фаолият юритган мактаб ўқувчилари ёруғ синфларда таълимни давом эттиради.
Аммо ҳақли савол туғилади.
Нима учун маҳаллий ҳокимлик вакиллари ёки халқ таълими бошқармаси қарийб ярим аср электр энергиясиз фаолият юритган мактабдаги бу вазиятга эътибор қаратмади?
Ёхуд айнан кеча бу ҳолат билан жуда «яқиндан» танишган Зоир Алиқулов олдинроқ бу масалага мутасадди ташкилотлар эътиборини қаратишга вақт тополмади?
Бугунги кунда Деҳқонобод тумани истеъмолчиларининг электр энергиясидан дебиторлик қарзлари меъёридан анча ошганлигидан ҳокимнинг хабари бормикан?», — дейилади хабарда.
Изоҳ (0)