Joriy yilning 15-noyabr kuni Toshkent shahar Mirzo Ulug‘bek tumani TTZ-1 mavzesidagi 8, 9, 26-uylar atrofida noqonuniy kesilayotgan daraxtlar to‘g‘risida Facebook’dagi “Potrebitel.uz” va “ChinovnikUZ” sahifalarida hamda Telegram’dagi “Insider.uz” kanalida xabar berilgan. Toshkent shahar hokimligi mazkur xabarlar bo‘yicha holatni o‘rganib chiqdi va ma’lumot berdi.
Qayd etilishicha, bu holat bo‘yicha Davlat ekologiya qo‘mitasi hamda uning Toshkent shahar boshqarmasiga yuqorida ko‘rsatilgan ijtimoy tarmoqlardan tushuntirish berish bo‘yicha murojaatlar kelib tushmagan.
Ma’lum qilinishicha, TTZ-1 mavzesidagi 8, 9 va 26-uylarga xizmat ko‘rsatuvchi “Navnihol Kommunal” MChJ tomonidan 2019-yilning 27-sentabr kuni Davlat xizmatlari agentligi orqali tabiiy omillar ta’sirida qurigan daraxtlarni kesishga ruxsatnoma so‘rab murojaat qilingan.
Toshkent shahar ekologiya va atrof-muhitni muhofaza qilish boshqarmasi inspektorlari tomonidan 2019-yilning 27—30-sentabr kunlari murojaat joyiga chiqib o‘rganilgan. O‘rganish natijasida 8, 9 va 26-uylar atrofidagi ikki dona chinor, bir dona shumtol, bir dona qayrag‘och daraxtlari tabiiy omillar ta’sirida quriganligi to‘g‘risidagi dalolatnoma “Navnihol Kommunal” MChJ rahbari Z.Tojimurodova va xolis sifatida jalb qilingan TTZ-1, 5-uy, 44-xonadonda istiqomat qiluvchi E.Abdullayeva ishtirokida rasmiylashtirilgan.
Hokimlikning ma’lumot berishicha, ushbu hududdagi chinor daraxtining quriganligi to‘g‘risida joriy yilning avgust—oktabr oylarida Toshkent shahrida kuz-qish mavsumiga tayyorgarlikni o‘rganish bo‘yicha faoliyat yuritgan Favqulodda vaziyatlar vazirligi ishchi guruhi tomonidan ham ko‘rsatib o‘tilgan.
Mazkur dalolatnoma asosida Toshkent shahar ekologiya va atrof-muhitni muhofaza qilish boshqarmasining 2019-yil 30-sentabrdagi mazkur daraxtlarning quriganligi sababli kesish to‘g‘risidagi 1932-son xulosasi rasmiylashtirilgan va 3-oktabr kuni Davlat xizmatlari agentligiga yuborilgan.
Joriy yilning 14-noyabr kuni TTZ-1 mavzesi 8, 9 va 26-uylar atrofidagi daraxtlarni kesish bo‘yicha Mirzo Ulug‘bek tumani hokimligining 98-son ruxsatnomasi rasmiylashtirilgan bo‘lib, uning amal qilish muddati 23-noyabrga qadar belgilangan.
Toshkent shahar ekologiya va atrof-muhitni muhofaza qilish boshqarmasi inspektorlari tomonidan joriy yil 15-noyabr kuni ushbu holat mahalla fuqarolar yig‘ini rahbari, okrug mas’uli, kommunal xizmat ko‘rsatuvchi tashkilot rahbari hamda ushbu hududdagi aholi vakillari ishtirokida o‘rganilgan hamda ular tomonidan ushbu daraxtni haqiqatda kesish lozimligi yana bir bor ta’kidlangan.
Xabar berilishicha, hozirgi vaqtda TTZ-1 mavzesi 8-uyning orqa tomonidagi chinor daraxti tagidan kesilmagan bo‘lib, faqatgina tepa qismi va shoxlari olib tashlangan.
Hokimlik xabarida ta’kidlanishicha, O‘zbekiston Prezidentining 2019-yil 30-oktabrdagi “2030-yilgacha bo‘lgan davrda O‘zbekiston Respublikasining atrof muhitni muhofaza qilish konsepsiyasini tasdiqlash to‘g‘risida”gi farmoniga asosan, 2019-yilning 1-noyabridan 2020-yilning 31-dekabriga qadar davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriy joriy etilgan. Ushbu davrda davlat o‘rmon fondiga kirmaydigan daraxtlar va butalar qimmatbaho navlarining kesilishiga ruxsatnoma berish man etilgan.
Bu me’yor tabiiy omillar yoki zararkunandalar, o‘simliklar kasalliklari ta’sirida zararlangan, qurib borayotgan yoki qurib qolgan, shuningdek, fuqarolarning hayoti va sog‘lig‘iga, yuridik va jismoniy shaxslarning mol-mulkiga xavf tug‘diruvchi daraxtlar va butalarni sanitar kesish va qirqishga joriy etilmasligi belgilab qo‘yilgan.
Izoh (0)