Bog‘chalarda faoliyat ko‘rsatayotgan tibbiyot xodimlari qayta tayyorlanadi

Maktabgacha ta’lim vazirligi va Toshkent vrachlar malakasini oshirish instituti o‘rtasida maktabgacha ta’lim tizimida sog‘liqni saqlash xizmatlarini ko‘rsatish sohasida hamkorlikni yo‘lga qo‘yish to‘g‘risida memorandum imzolandi. Bu haqda vazirlik matbuot xizmati xabar berdi.

Mazkur memorandumga ko‘ra, endilikda ta’lim bilan bir qatorda bolalarni sog‘lomlashtirish va reabilitatsiya qilish, kasalliklarni oldini olish, sog‘lom turmush tarzi ko‘nikmalarini shakllantirish va eng asosiysi maktabgacha ta’lim tizimida sog‘liqni saqlash xizmatlari sifatini oshirishda institut bilan o‘zaro hamkorlik yo‘lga qo‘yildi.

Memorandumga ko‘ra, quyidagi yo‘nalishlarini belgilab olindi:

• maktabgacha ta’lim muassasalarida faoliyat ko‘rsatayotgan tibbiyot xodimlarini qayta tayyorlash va malakasini oshirish;
• maktabgacha ta’lim muassasalarida bolalar salomatligini ta’minlash sohasidagi dastur materiallarini ishlab chiqishda ishtirok etish, maktabgacha ta’lim muassasalarida xizmat qilayotgan tibbiyot xodimlari uchun olingan mahsulotlarni baholashga qaratilgan talab va mezonlarni ishlab chiqish, bog‘chadagi hamshiralar uchun masofaviy ta’limni joriy etish, elektron kontent yaratish;
• maktabgacha ta’lim muassasalarida bolalarni sog‘lomlashtirish va bu sohada qo‘shma ilmiy-tadqiqot loyihalarini amalga oshirish.