Aktrisa Gavhar Sharipova olamdan o‘tdi. Dastlab Qashqadaryo viloyati IIBB Yo‘l harakati xavfsizligi xizmati aktrisa yurib ketayotgan avtobusning eshigini o‘zi ochib yuborib, undan tushib ketgani haqida xabar tarqatgan edi. So‘nggi ma’lumotlarga ko‘ra, u avtobus emas, yuk mashinasida bo‘lgan va unga haydovchi shilqimlik qilgan; aktrisa soatiga 140 kilometr tezlikda ketayotgan mashina eshigini ochib, undan tushib ketgan va halok bo‘lgan.
“Kun.uz” Toshkent shahar hokimi Jahongir Ortiqxo‘jayev va nashr muxbirlari o‘rtasida 15-avgust kuni hokimlik binosida bo‘lib o‘tgan suhbatning yangi — 14 daqiqadan ko‘proq davom etadigan versiyasini e’lon qildi. Unda, jumladan, hokim biror odamga besoqolboz degan nom yopishtirishni “olti soniyada tashkillashtira olishi”ni, biroq “bunday ifloslik qilmasligi”ni eshitish mumkin. Yangi audioning dastlab e’lon qilingan 1,5 daqiqalik audiodan farqli jihatlari ko‘p — unda hokimning “rahbarga yoqadimi-yo‘qmi”, “xo‘rozlar”, “cho‘ktirvoraman” kabi izohlari tushirib qoldirilgan.
Eldor Shomurodovning dubli O‘zbekiston milliy terma jamoasiga Falastin ustidan g‘alaba keltirdi. Endi hamma Eldorni “Goldor” deb chaqiryapti. Ko‘z tegmasin — shunday sermahsul o‘yin ko‘rsatishda davom etaversin u! Shu bilan Yevropaning kuchli chempionatlariga ketib qolsa ham mayliga edi. Ha-ya, aytmoqchi, yana ketma-ket ikkita o‘yinda gol ursa, afsonaviy Oleg Shatskixning rekordini takrorlaydi.
Nyu-Yorkda IShID nomidan terakt qilgan asli o‘zbekistonlik Sayfullo Soipov gapirishni “boshladi”. U sudyaga qarab: “Siz meni o‘lgan sakkiz kishi uchun sud qilmoqdasiz. Nega minglab musulmon ayol va bolalarning o‘lishiga javobgar bo‘lganlarni sud qilmaysiz?”, debdi. Eslatib o‘tamiz, Tramp uni o‘limga hukm qilishga chaqirgan edi.
O‘zbekistonda yaqin qarindoshlarga tegishli transport vositasini “doverennost”siz boshqarishga ruxsat berildi. Yaqin qarindoshlar deganda ota-ona, er (xotin), farzandlar, aka-ukalar, opa-singillar nazarda tutilmoqda. “Doverennost” talab qilinmagani bilan sug‘urta polisida qarindoshlarning ismi va qarindoshlik darajasi ko‘rsatilgan bo‘lishi shart. Qarindoshlikni ham o‘zingiz emas, sug‘urta kompaniyasi ko‘rsatishi kerak.
Munosabatlar, raddiyalar, bayonotlar. Jizzaxda muntazam dars qoldirgan 8-sinf o‘quvchilarining o‘qituvchi tomonidan kaltaklanishi yuzasidan xizmat tekshiruvi belgilandi. Samarqandda so‘roqqa chaqirilgan shaxs ichki ishlar xodimlarining kaltaklaridan emas, o‘tkir yurak qon-tomir yetishmovchiligidan vafot etgan. Rahbari ayni vaqtda O‘zLiDePning ham raisi hisoblangan O‘zbekiston Fermerlar kengashi “Milliy tiklanish” partiyasi yetakchisi Alisher Qodirovni “qabul qilingan qonun Konstitutsiyaga zid” kabi bayonotlar berishda mas’uliyatli bo‘lishga chaqirdi. Samarqandda tuproq ostida qolib, halok bo‘lgan ikki yollanma ishchining “Suvoqova” korxonasiga hech qanday aloqasi yo‘q. Sog‘liqni saqlash vazirligi kuydirgi kasalligi kolbasadan yuqmasligini ma’lum qildi. Qashqadaryoda 12 noyabr kuni pomidor-bodring konservasidan zaharlangan yetti kishidan biri — ona, ko‘rsatilgan tibbiy yordamga qaramay, 18-noyabr kuni vafot etgan; ota va to‘ng‘ich o‘g‘il sun’iy nafas olish apparatiga ulangan.
O‘zbekistonda yana nima yangiliklar? Samarqandda yetishtirgan paxtasini zavodga topshirayotgan fermer pichoqlandi. Toshkent viloyatida temiryo‘l kesishmasida qoidani buzgan haydovchilarga qarshi reyd o‘tkazilmoqda. Millatlararo munosabatlar sohasida davlat siyosatining asosiy yo‘nalishlari belgilandi. Ishsizlik nafaqasi miqdorini keskin ko‘paytirish taklif qilinmoqda. Jahon banki O‘zbekistonga 500 million dollar qarz ajratadi. Yunusoboddagi omborxonada yirik yong‘in yuz berdi. 6 ta hududning bosh soliqchilari o‘zgardi. Toshkentdan 100 kilometr narida Turk xoqonligi davriga oid qabriston topildi. Sankt-Peterburgda O‘zbekiston fuqarosini uch kishi pichoqladi. Jizzaxda Milliy gvardiya tomonidan 90 metrli ulkan bayroq namoyish etildi.
Dunyoda nima gap? Livanda namoyishchilar parlament binosiga olib boruvchi yo‘llarni yopib qo‘ydi. Gruziyada politsiya parlamentga kirishni to‘sib qo‘ygan namoyishchilarni kuch bilan tarqatib yubordi. Eron oliy yetakchisi mamlakatdagi norozilik namoyishlari ortida xorijlik dushmanlar turganini ta’kidladi. Kuvayt bosh vaziri vazifasini bajaruvchi shayx yangi hukumat shakllantirish niyatida emas. Yaman isyonchi xusiylari Qizil dengizda uchta kemani egallab oldi. Rossiya Ukrainaga Kerch bo‘g‘ozida bir yil avval qo‘lga olingan kemalarni qaytarib berdi. Turkiya qo‘lga olgan IShID vakili Al-Bag‘dodiy joylashgan manzil haqida ma’lumot bergan. Pokiston ballistik raketani sinovdan o‘tkazdi.
Izoh (0)