Актриса Гавҳар Шарипова оламдан ўтди. Дастлаб Қашқадарё вилояти ИИББ Йўл ҳаракати хавфсизлиги хизмати актриса юриб кетаётган автобуснинг эшигини ўзи очиб юбориб, ундан тушиб кетгани ҳақида хабар тарқатган эди. Сўнгги маълумотларга кўра, у автобус эмас, юк машинасида бўлган ва унга ҳайдовчи шилқимлик қилган; актриса соатига 140 километр тезликда кетаётган машина эшигини очиб, ундан тушиб кетган ва ҳалок бўлган.
«Kun.uz» Тошкент шаҳар ҳокими Жаҳонгир Ортиқхўжаев ва нашр мухбирлари ўртасида 15 август куни ҳокимлик биносида бўлиб ўтган суҳбатнинг янги — 14 дақиқадан кўпроқ давом этадиган версиясини эълон қилди. Унда, жумладан, ҳоким бирор одамга бесоқолбоз деган ном ёпиштиришни «олти сонияда ташкиллаштира олиши»ни, бироқ «бундай ифлослик қилмаслиги»ни эшитиш мумкин. Янги аудионинг дастлаб эълон қилинган 1,5 дақиқалик аудиодан фарқли жиҳатлари кўп — унда ҳокимнинг «раҳбарга ёқадими-йўқми», «хўрозлар», «чўктирвораман» каби изоҳлари тушириб қолдирилган.
Элдор Шомуродовнинг дубли Ўзбекистон миллий терма жамоасига Фаластин устидан ғалаба келтирди. Энди ҳамма Элдорни «Голдор» деб чақиряпти. Кўз тегмасин — шундай сермаҳсул ўйин кўрсатишда давом этаверсин у! Шу билан Европанинг кучли чемпионатларига кетиб қолса ҳам майлига эди. Ҳа-я, айтмоқчи, яна кетма-кет иккита ўйинда гол урса, афсонавий Олег Шацкихнинг рекордини такрорлайди.
Нью-Йоркда ИШИД номидан теракт қилган асли ўзбекистонлик Сайфулло Соипов гапиришни «бошлади». У судьяга қараб: «Сиз мени ўлган саккиз киши учун суд қилмоқдасиз. Нега минглаб мусулмон аёл ва болаларнинг ўлишига жавобгар бўлганларни суд қилмайсиз?», дебди. Эслатиб ўтамиз, Трамп уни ўлимга ҳукм қилишга чақирган эди.
Ўзбекистонда яқин қариндошларга тегишли транспорт воситасини «доверенност»сиз бошқаришга рухсат берилди. Яқин қариндошлар деганда ота-она, эр (хотин), фарзандлар, ака-укалар, опа-сингиллар назарда тутилмоқда. «Доверенност» талаб қилинмагани билан суғурта полисида қариндошларнинг исми ва қариндошлик даражаси кўрсатилган бўлиши шарт. Қариндошликни ҳам ўзингиз эмас, суғурта компанияси кўрсатиши керак.
Муносабатлар, раддиялар, баёнотлар. Жиззахда мунтазам дарс қолдирган 8-синф ўқувчиларининг ўқитувчи томонидан калтакланиши юзасидан хизмат текшируви белгиланди. Самарқандда сўроққа чақирилган шахс ички ишлар ходимларининг калтакларидан эмас, ўткир юрак қон-томир етишмовчилигидан вафот этган. Раҳбари айни вақтда ЎзЛиДеПнинг ҳам раиси ҳисобланган Ўзбекистон Фермерлар кенгаши «Миллий тикланиш» партияси етакчиси Алишер Қодировни «қабул қилинган қонун Конституцияга зид» каби баёнотлар беришда масъулиятли бўлишга чақирди. Самарқандда тупроқ остида қолиб, ҳалок бўлган икки ёлланма ишчининг «Сувоқова» корхонасига ҳеч қандай алоқаси йўқ. Соғлиқни сақлаш вазирлиги куйдирги касаллиги колбасадан юқмаслигини маълум қилди. Қашқадарёда 12 ноябрь куни помидор-бодринг консервасидан заҳарланган етти кишидан бири — она, кўрсатилган тиббий ёрдамга қарамай, 18 ноябрь куни вафот этган; ота ва тўнғич ўғил сунъий нафас олиш аппаратига уланган.
Ўзбекистонда яна нима янгиликлар? Самарқандда етиштирган пахтасини заводга топшираётган фермер пичоқланди. Тошкент вилоятида темирйўл кесишмасида қоидани бузган ҳайдовчиларга қарши рейд ўтказилмоқда. Миллатлараро муносабатлар соҳасида давлат сиёсатининг асосий йўналишлари белгиланди. Ишсизлик нафақаси миқдорини кескин кўпайтириш таклиф қилинмоқда. Жаҳон банки Ўзбекистонга 500 миллион доллар қарз ажратади. Юнусободдаги омборхонада йирик ёнғин юз берди. 6 та ҳудуднинг бош солиқчилари ўзгарди. Тошкентдан 100 километр нарида Турк хоқонлиги даврига оид қабристон топилди. Санкт-Петербургда Ўзбекистон фуқаросини уч киши пичоқлади. Жиззахда Миллий гвардия томонидан 90 метрли улкан байроқ намойиш этилди.
Дунёда нима гап? Ливанда намойишчилар парламент биносига олиб борувчи йўлларни ёпиб қўйди. Грузияда полиция парламентга киришни тўсиб қўйган намойишчиларни куч билан тарқатиб юборди. Эрон олий етакчиси мамлакатдаги норозилик намойишлари ортида хорижлик душманлар турганини таъкидлади. Кувайт бош вазири вазифасини бажарувчи шайх янги ҳукумат шакллантириш ниятида эмас. Яман исёнчи хусийлари Қизил денгизда учта кемани эгаллаб олди. Россия Украинага Керч бўғозида бир йил аввал қўлга олинган кемаларни қайтариб берди. Туркия қўлга олган ИШИД вакили Ал-Бағдодий жойлашган манзил ҳақида маълумот берган. Покистон баллистик ракетани синовдан ўтказди.
Изоҳ (0)