O‘tgan 3 oy davomida “O‘zbekiston temir yo‘llari” AJ Harbiylashtirilgan qo‘riqlash boshqarmasi tomonidan 154 ta temir yo‘l kesishmasida qoida buzib harakatlangan transport vositalarining foto va video materiallari kelib tushgan. Bu haqda “Daryo”ga Toshkent viloyati IIBB Yo‘l harakati xavfsizligi boshqarmasi matbuot xizmati ma’lum qildi.
Qayd etilishicha, Toshkent viloyatida joylashgan temir yo‘l kesishmalarida havfsizlikni kompleks ta’minlash, sodir bo‘lishi mumkin bo‘lgan yo‘l transport hodisalarini oldini olish maqsadida Toshkent viloyati IIBB YHX boshqarmasi “O‘zbekiston temir yo‘llari” AJ Harbiylashtirilgan qo‘riqlash boshqarmasi bilan hamkorlikda video kuzatuv kameralari yordamida temir yo‘l kesishmalaridan o‘tish qoidalari buzib harakatlangan transport vositalari haydovchilariga nisbatan choralar ko‘rilmoqda.
Ushbu foto va videoda qayd etilgan transport vositalarining egalari aniqlanib, ularga nisbatan Ma’muriy javobgarlik to‘g‘risidagi kodeksning 130-moddasiga (Transport vositalari haydovchilarining temir yo‘lning o‘tish joylaridan o‘tish qoidalarini buzishi) ko‘ra ma’muriy bayonnomalar rasmiylashtirilmoqda.
Mavzuga doir: Toshkent viloyatidagi “Afrosiyob” poyezdi harakatlanadigan temir yo‘l kesishmalarida yo‘l o‘tkazgichlar quriladi
Shuningdek, o‘z hayotini xavf ostiga qo‘ygan holda kesishmada qarama-qarshi yo‘nalishga chiqib harakatlangan Captiva haydovchisiga ham tegishli choralar ko‘rilgan.
Xabarda ta’kidlanishicha, haydovchilarining temir yo‘lning o‘tish joylaridan o‘tish qoidalarini buzishi Ma’muriy javobgarlik to‘g‘risidagi kodeksning 130-moddasi 1-qismiga asosan bazaviy hisoblash miqdorining 3 baravari, ya’ni 669 ming so‘m miqdorida jarima solishga sabab bo‘ladi.
Izoh (0)