Futbol bo‘yicha O‘zbekiston terma jamoasi 19-noyabr, seshanba kuni JCh—2022 saralashining ikkinchi bosqichi doirasida Falastinga qarshi maydonga tushadi.
Uchrashuv oldidan falastinliklar ustozi Nuriddin Uld Ali matbuot anjumanida ishtirok etib, jurnalistlar savollariga javob qaytardi, deb xabar beradi “Daryo” muxbiri.
Mavzuga doir: Vadim Abramov: “Vazifa o‘zgargani yo‘q”
O‘zbekistonga qarshi o‘yin haqida— Ertangi uchrashuv har ikki jamoa uchun ham juda muhim hisoblanadi. Har ikki jamoa ham o‘tgan uchrashuvdagi mag‘lubiyatni unutishga harakat qiladi. Ikki jamoa ham faqat g‘alaba uchun maydonga chiqadi. Sababi ularning ikkisi ham keyingi bosqichga chiqishni xohlaydi.
Abramov qo‘l ostidagi jamoani qanchalik o‘rgangani haqida
— To‘g‘ri, O‘zbekiston terma jamoasida murabbiy almashdi, biroq o‘yinchilar o‘sha-o‘sha. Zamonaviy futbolda barcha terma jamoalar bir-biri haqida juda yaxshi ma’lumotga ega. Raqibdan hech narsani yashirib bo‘lmaydi. O‘zbekiston terma jamoasining yetakchi futbolchilarini yaxshi bilamiz, ularning kuchli va kuchsiz tomonlaridan xabarimiz bor. Ertangi o‘yindagi asosiy maqsadimiz — uch ochko ishlash. Shundagina biz keyingi bosqichga chiqish uchun umidni saqlab qolgan bo‘lamiz.
O‘zbekiston terma jamoasidagi kuchli futbolchilar haqida
— Birinchi navbatda O‘zbekiston terma jamoasi darvozaboni (Eldor Suyunov), chap qanot himoyachisi (Farruh Sayfiyev), so‘nggi o‘yinda markaziy himoyada o‘ynagan 9-raqam egasi (Odil Ahmedov), 10-raqamli futbolchi (Jaloliddin Masharipov), 17-raqamli hujumchi (Doston Hamdamov). Va albatta, “Rostov” klubida to‘p surayotgan Eldor Shomurodov. Men doim uning o‘yinlarini kuzatib boraman. Biz uchun asosiy savol ertaga markaziy himoyada kim harakat qilishi, 15-raqamli futbolchimi (Yegor Krimets) yoki 9-raqam (Odil Ahmedov)? Krimets jarohat olganmi...?
Falastin uy stadionidan farqli o‘laroq tabiiy qoplamali maydonda o‘ynashi haqida
— Bizda tabiiy maydonda o‘ynash borasida hech qanday muammo yo‘q. Agar maydon holati yaxshi bo‘lsa, boshqa hech qanday muammoni ko‘rmayapman.
O‘zbekistonga qarshi hujumkor yoki himoyaviy o‘yin ko‘rsatish haqida
— Ertangi o‘yinga har jihatdan tayyor bo‘lishimiz kerak — himoyaviy tomondan ham, hujumkor jihatdan ham.
Ob-havoning o‘yinga ta’siri haqida
— Biz ob-havoga moslashish uchun bu yerga uch kun avval keldik. Hozirgacha ikki bor mashg‘ulot olib bordik. Shunday ekan, bu borada hech qanday muammo yo‘q.
O‘zbekiston — Saudiya Arabistoni uchrashuviga munosabati
— Albatta, o‘yinni ko‘rib chiqdik. Bu o‘yin borasida o‘z fikrimga egaman, uni futbolchilar va murabbiylar shtabi bilan o‘rtoqlashdim. Ammo O‘zbekiston terma jamoasi o‘yini haqidagi fikrlarimni bu yerda aytish noto‘g‘ri deb o‘ylayman.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)