Vadim Abramov: “Vazifa o‘zgargani yo‘q”

Futbol bo‘yicha O‘zbekiston terma jamoasi 19-noyabr, seshanba kuni JCh—2022 saralashining ikkinchi bosqichi doirasida Falastinga qarshi maydonga tushadi.

Uchrashuv oldidan o‘zbekistonliklar ustozi Vadim Abramov matbuot anjumanida ishtirok etib, jurnalistlar savollariga javob qaytardi, deb xabar beradi “Daryo” muxbiri.

Falastinga qarshi o‘yin haqida

— Ushbu bahs qanchalik muhim ekanligini barcha birdek tushunib turibdi. Saudiyaga yutqazgach, musobaqa jadvalidagi holat o‘zgardi. Biroq vazifa o‘zgargani yo‘q. Uyda o‘ynaymiz va g‘alaba qozonishga majburmiz. Buni hamma yaxshi biladi. Buning uchun ertangi raqibga qarshi bor kuchimiz bilan o‘ynash talab etiladi. Keyin esa kelasi yilgi o‘yinlarga xotirjam tayyorlanish mumkin bo‘ladi. Uchta o‘yin qolganini nazarda tutyapman. JCh—2022 saralashining uchinchi bosqichiga chiqish uchun hali imkoniyat bor. Shuning uchun ham Falastinga qarshi bahsning muhimligini tushunib turibmiz.

Saudiya Arabistonidan uchralgan mag‘lubiyatdan so‘ng futbolchilarning ruhiy holati haqida

— Ular professional. Shunday ekan, tayyor deb umid qilaman. Professionallar kayfiyat yoki ruhiy holatidan qat’i nazar maydonga tushib, muxlislarni xursand qilishi kerak. Ular Saudiyaga qarshi va Falastinga qarshi birinchi o‘yindagi mag‘lubiyat tasodif ekanligini isbotlashi kerak. Qarzni qaytarish lozim.

Hujumkor o‘yin sabab so‘nggi daqiqalarda gol o‘tkazib yuborilishi va bunga qarshi yo‘l haqida

— Hamma bizning hujumkor o‘yin sabab gollar o‘tkazib yuborayotganimizni aytmoqda. Ammo ushbu bosqichda birinchi marta bo‘ldi. Bundan dars olamiz deb umid qilaman. Yana takrorlayman: Saudiyaga qarshi o‘yindagi gollar ham mantiqsiz bo‘ldi. Ammo fakt shuki, hujum qilsang, albatta, qarshi hujumlarni o‘tkazib yuborasan. Dunyo futbolida ham shunday. Qaysi jamoa, qanday tarkibga ega bo‘lmasin, hujum qilaversa, ortda bo‘sh hududlar paydo bo‘ladi. Va darvozasi oldida xavfli vaziyat vujudga keladi. Raqibni ham o‘rganamiz. Masalan, Falastin ham juda oddiy, ammo samarali futbol o‘ynaydi. Ikki futbolchisi bo‘ydor hujumchiga to‘pni oshiradi. Shunday futbol ham o‘ynasa bo‘ladi. Ular to‘g‘ri o‘yin ko‘rsatmoqda. Yigitlarga ham bu haqda tushunchalar berishga harakat qilamiz.

Falastinga qarshi qanday o‘ynaladi

— O‘z o‘yinimizni ko‘rsatishga harakat qilamiz. Raqib qanchalik qo‘yib bersa, shunchalik o‘yin ko‘rsatamiz.

Uch nafar markaziy himoyachi bilan o‘ynash imkoniyati haqida

— Ahmedovga kelsak, u yana himoya markazida o‘ynashi mumkin. Boisi Yegor Krimetsni raqibning bo‘ydor hujumchisiga qarshi qo‘ymoqchi edik. Biroq uning issig‘i chiqdi. Shu boisdan ham Falastinga qarshi bahsni o‘tkazib yuboradi. Uch nafar markaziy himoyachi bilan o‘ynash yaxshi. Biroq buning uchun vaqt kerak. Shunchaki uch nafar futbolchini markazga qo‘yish bilan ish bitmaydi.

Terma jamoadagi kelajagi haqida

— Shoshmaslikni so‘rardim. Bitta muammoni yechib olaylik. Birinchi vazifa keyingi bosqichga chiqish.

Odil Ahmedovni ikkinchi bo‘limda maydonga tushirish va Eldor Suyunovdan tajribaliroq darvozabon topish haqida

— Odil Ahmedovga kelsak o‘z vaqtida Shatskixni ko‘p tanqid qilishardi. Nimaga bilasizmi? Sababi terma jamoa yutqazsa, eng birinchi yetakchilar tanqid qilinadi. Masalan, Argentina yutqazsa, Messini tanqid qilishadi. Eldor Suyunov ayni paytda terma jamoaning birinchi raqamli posboni. Kelinglar, bu siklni tugatib olaylik. U hali darvozabonlar uchun yoshi ancha yosh. Kimni taklif qilasiz? Botirali Ergashev? O‘tkir Yusupov? Biz ularning hammasini sinab ko‘rishimiz mumkin. Ammo bu borada hamma terma jamoalarda muammo bor. Hozir ancha darvozabonlarni sanashingiz mumkin, keyingi safar boshqa darvozabonlarni chaqirsak yana boshqa 3-4 nafar futbolchini taklif qilasiz...

Jaloliddin Masharipovning “Paxtakor”da yetakchiligi, biroq terma jamoada bunday rolda emasligi haqida

— Ha, Jaloliddin “Paxtakor”da yetakchi. Ushbu klubning 70 foiz raqiblari kuchsiz. Raqiblar doim kuchli futbolchilarning jihatlarini o‘rganadi. Mana biz ham Falastin hujumchisining kuchli jihatlarini o‘rgandik. Jaloliddinga to‘p kelishi bilan, unga 2-3 nafar futbolchi boradi. Shu boisdan ham uning oldinga o‘tishi qiyin bo‘lmoqda.

Chet ellik futbolchilarni mahalliylashtirish haqida

— Butun dunyoda bu jarayon kechmoqda. Terma jamoaga foydasi tegadigan futbolchilarni mahalliylashtirishga ijobiy qarayman. Masalan, Namanganning “Navbahor”ida Igor Golban, “Paxtakor”da esa Dragan Cheran bor.