Фаластин бош мураббийи Ўзбекистонга қарши баҳс ҳақида: «Мақсадимиз — фақат ғалаба»

Футбол бўйича Ўзбекистон терма жамоаси 19 ноябрь, сешанба куни ЖЧ—2022 саралашининг иккинчи босқичи доирасида Фаластинга қарши майдонга тушади.

Учрашув олдидан фаластинликлар устози Нуриддин Улд Али матбуот анжуманида иштирок этиб, журналистлар саволларига жавоб қайтарди, деб хабар беради «Дарё» мухбири.

Ўзбекистонга қарши ўйин ҳақида

— Эртанги учрашув ҳар икки жамоа учун ҳам жуда муҳим ҳисобланади. Ҳар икки жамоа ҳам ўтган учрашувдаги мағлубиятни унутишга ҳаракат қилади. Икки жамоа ҳам фақат ғалаба учун майдонга чиқади. Сабаби уларнинг иккиси ҳам кейинги босқичга чиқишни хоҳлайди.

Абрамов  қўл остидаги жамоани қанчалик ўргангани ҳақида

— Тўғри, Ўзбекистон терма жамоасида мураббий алмашди, бироқ ўйинчилар ўша-ўша. Замонавий футболда барча терма жамоалар бир-бири ҳақида жуда яхши маълумотга эга. Рақибдан ҳеч нарсани яшириб бўлмайди. Ўзбекистон терма жамоасининг етакчи футболчиларини яхши биламиз, уларнинг кучли ва кучсиз томонларидан хабаримиз бор. Эртанги ўйиндаги асосий мақсадимиз — уч очко ишлаш. Шундагина биз кейинги босқичга чиқиш учун умидни сақлаб қолган бўламиз.

Ўзбекистон терма жамоасидаги кучли футболчилар ҳақида

— Биринчи навбатда Ўзбекистон терма жамоаси дарвозабони (Элдор Суюнов), чап қанот ҳимоячиси (Фарруҳ Сайфиев), сўнгги ўйинда марказий ҳимояда ўйнаган 9-рақам эгаси (Одил Аҳмедов), 10-рақамли футболчи (Жалолиддин Машарипов), 17-рақамли ҳужумчи (Достон Ҳамдамов). Ва албатта, «Ростов» клубида тўп сураётган Элдор Шомуродов. Мен доим унинг ўйинларини кузатиб бораман. Биз учун асосий савол эртага марказий ҳимояда ким ҳаракат қилиши, 15-рақамли футболчими (Егор Кримец) ёки 9-рақам (Одил Аҳмедов)? Кримец жароҳат олганми...?

Фаластин уй стадионидан фарқли ўлароқ табиий қопламали майдонда ўйнаши ҳақида

— Бизда табиий майдонда ўйнаш борасида ҳеч қандай муаммо йўқ. Агар майдон ҳолати яхши бўлса, бошқа ҳеч қандай муаммони кўрмаяпман.

Ўзбекистонга қарши ҳужумкор ёки ҳимоявий ўйин кўрсатиш ҳақида

— Эртанги ўйинга ҳар жиҳатдан тайёр бўлишимиз керак — ҳимоявий томондан ҳам, ҳужумкор жиҳатдан ҳам.

Об-ҳавонинг ўйинга таъсири ҳақида

— Биз об-ҳавога мослашиш учун бу ерга уч кун аввал келдик. Ҳозиргача икки бор машғулот олиб бордик. Шундай экан, бу борада ҳеч қандай муаммо йўқ.

Ўзбекистон — Саудия Арабистони учрашувига муносабати

— Албатта, ўйинни кўриб чиқдик. Бу ўйин борасида ўз фикримга эгаман, уни футболчилар ва мураббийлар штаби билан ўртоқлашдим. Аммо Ўзбекистон терма жамоаси ўйини ҳақидаги фикрларимни бу ерда айтиш нотўғри деб ўйлайман.