Toshkentda arxitektura-qurilish va dizaynerlik maktablari uchun xalqaro festival o‘z ishini boshladi

Toshkentda 14-noyabr kuni Yevrosiyo arxitektura-qurilish va dizaynerlik maktablari IX xalqaro festivali o‘z ishini boshladi, deb xabar berdi O‘zA.

O‘zbekiston Qurilish vazirligi tomonidan Turkiya Qurilish vazirligi va Qozog‘iston bosh arxitektura-qurilish akademiyasi hamkorligida tashkil etilgan festivalda O‘zbekiston, Turkiya, Xitoy, Rossiya, Qozog‘iston kabi 20 dan ortiq mamlakatning 80 ga yaqin vakillari ishtirok etmoqda.

Festival ilk bor 2009-yilda tashkil etilgan. O‘tgan vaqt mobaynida ushbu festivalda 2 ming nafarga yaqin talaba o‘z ishi bilan ishtirok etgan.

Yevrosiyo arxitektura-qurilish va dizaynerlik maktablari IX xalqaro festivali ochilishida Toshkent arxitektura-qurilish instituti rektori R.Hakimov, Qozog‘iston bosh arxitektura-qurilish akademiyasi prezidenti A.Kusainov va boshqalar so‘zga chiqdi.

Festival ilk bor tashkil etilgandan buyon uning geografiyasi, ishtirok etuvchi mamlakatlar soni yil sayin ortib bormoqda. Dastlabki festivalda 7 mamlakatdan 18 ta oliy ta’lim muassasasi ishtirok etgan bo‘lsa, 2018-yilda Yevrosiyo mintaqasidan 18 davlatning 56 ta universiteti talabalari qatnashdi.

Tadbirni o‘tkazishdan maqsad – arxitektura-qurilish va dizaynerlik maktablari o‘rtasidagi hamkorlikni yanada rivojlantirish, ushbu yo‘nalishdagi bitiruvchilarning diplom ishi loyihasini qo‘llab-quvvatlash, ular o‘z salohiyatini namoyish etishi uchun imkoniyat yaratish, oliy ta’lim tizimi talabalari o‘rtasida o‘zaro tajriba almashishni mustahkamlashdan iborat.

Festival doirasida o‘tkaziladigan Yevrosiyo oliy o‘quv yurtlari bitiruvchilarining arxitektura-qurilish, dizaynerlik, geodeziya, kartografiya va qurilish materiallari yo‘nalishlari bo‘yicha bitiruv-malakaviy ishlari ko‘rik-tanloviga 550 dan ortiq talaba diplom loyihasini taqdim etgan.

G‘olib deb topilgan talabalarning ijodiy ishi loyiha institutlari, xususiy sektor vakillari tomonidan amaliyotda qo‘llanilishi uchun tavsiya etiladi.

Festival doirasida Turkiya atrof-muhit va shaharsozlik vazirining o‘rinbosari boshchiligidagi delegatsiya vakillari uchun poytaxt markazida qad rostlayotgan Tashkent City majmuiga ekskursiya tashkil etildi.

Tashkent City’ning 5-lot qismidan joy olgan Kongress-holl va Hilton mehmonxonasi mehmonlarda katta qiziqish uyg‘otdi. Ekskursiya davomida mehmonlar Tashkent City’ning 18 gektarlik zamonaviy parkini ham tomosha qildi.