Тошкентда 14 ноябрь куни Евросиё архитектура-қурилиш ва дизайнерлик мактаблари IX халқаро фестивали ўз ишини бошлади, деб хабар берди ЎзА.
Ўзбекистон Қурилиш вазирлиги томонидан Туркия Қурилиш вазирлиги ва Қозоғистон бош архитектура-қурилиш академияси ҳамкорлигида ташкил этилган фестивалда Ўзбекистон, Туркия, Хитой, Россия, Қозоғистон каби 20 дан ортиқ мамлакатнинг 80 га яқин вакиллари иштирок этмоқда.
Фестиваль илк бор 2009 йилда ташкил этилган. Ўтган вақт мобайнида ушбу фестивалда 2 минг нафарга яқин талаба ўз иши билан иштирок этган.
Евросиё архитектура-қурилиш ва дизайнерлик мактаблари IX халқаро фестивали очилишида Тошкент архитектура-қурилиш институти ректори Р.Ҳакимов, Қозоғистон бош архитектура-қурилиш академияси президенти А.Кусаинов ва бошқалар сўзга чиқди.
Фестиваль илк бор ташкил этилгандан буён унинг географияси, иштирок этувчи мамлакатлар сони йил сайин ортиб бормоқда. Дастлабки фестивалда 7 мамлакатдан 18 та олий таълим муассасаси иштирок этган бўлса, 2018 йилда Евросиё минтақасидан 18 давлатнинг 56 та университети талабалари қатнашди.
Тадбирни ўтказишдан мақсад – архитектура-қурилиш ва дизайнерлик мактаблари ўртасидаги ҳамкорликни янада ривожлантириш, ушбу йўналишдаги битирувчиларнинг диплом иши лойиҳасини қўллаб-қувватлаш, улар ўз салоҳиятини намойиш этиши учун имконият яратиш, олий таълим тизими талабалари ўртасида ўзаро тажриба алмашишни мустаҳкамлашдан иборат.
Фестиваль доирасида ўтказиладиган Евросиё олий ўқув юртлари битирувчиларининг архитектура-қурилиш, дизайнерлик, геодезия, картография ва қурилиш материаллари йўналишлари бўйича битирув-малакавий ишлари кўрик-танловига 550 дан ортиқ талаба диплом лойиҳасини тақдим этган.
Ғолиб деб топилган талабаларнинг ижодий иши лойиҳа институтлари, хусусий сектор вакиллари томонидан амалиётда қўлланилиши учун тавсия этилади.
Фестиваль доирасида Туркия атроф-муҳит ва шаҳарсозлик вазирининг ўринбосари бошчилигидаги делегация вакиллари учун пойтахт марказида қад ростлаётган Tashkent City мажмуига экскурсия ташкил этилди.
Tashkent City’нинг 5-лот қисмидан жой олган Конгресс-ҳолл ва Hilton меҳмонхонаси меҳмонларда катта қизиқиш уйғотди. Экскурсия давомида меҳмонлар Tashkent City’нинг 18 гектарлик замонавий паркини ҳам томоша қилди.
Изоҳ (0)