Taniqli fransuz aktyori va O‘zbekistonning Fransiyadagi turizm elchisi etib tayinlangan Jerar Depardye mamlakatga ijodiy tashrifi davomida Buxoro viloyatiga bordi. Bu haqda Buxoro viloyati Turizmni rivojlantirish departamenti axborot xizmati xabar berdi.
Fransuz telekanallarida videoroliklar tayyorlash orqali sayyohlik potensialini oshirish va O‘zbekistonning ijobiy imijini targ‘ib qilishni maqsad qilgan Turizmni rivojlantirish davlat qo‘mitasi B-Tween fransuz ishlab chiqarish kompaniyasi bilan birgalikda Paris Premiere telekanali uchun “Ipak yo‘li” hujjatli filmini tayyorlash rejasini ishlab chiqqan edi. Mazkur filmda fransuz aktyori Jerar Depardye bosh rolni ijro etishi ko‘zda tutilgan bo‘lib, O‘zbekiston haqidagi hujjatli film suratga olish ishlari uchun aktyor Buxoroga keldi.
Mashhur aktyor Buxoro shahar hokimi Karim Kamolov tomonidan Kogon temir yo‘l vokzalida karnay-surnay sadolari ostida tantanali kutib olindi.
Mavzuga doir: Jerar Depardye O‘zbekistonga keldi. Islom sivilizatsiyasi markazida u bilan uchrashuv bo‘lib o‘tdi
Shundan so‘ng restoranlarning birida Buxoroning “Sofi osh”ini tayyorlash mahorat darsida ham ishtirok etdi.
“Viloyatingiz obidalarining qadimiy bejirim qiyofasi bilan tanishish barobarida xalqingizni mehmondo‘stligiga yana bir karra amin bo‘ldim, ayniqsa, buxorocha ohanglar sehri va milliy shirinliklaru xushta’m choy va totli mevalar meni maftun etganini alohida ta’kidlab o‘tishim zarur”, – deydi aktyor.
Izoh (0)