Chelyabinsk viloyati Ust-Katav shahrida istiqomat qiluvchi o‘zbekistonlik ayol 6-noyabr kuni politsiyaga murojaat qilib, 20, 15 va 11 yoshli uch nafar farzandi yo‘qolib qolganini bildirdi, deb xabar beradi “Enob”.
Ma’lum bo‘lishicha, ertasi kuni ularning uyida yong‘in sodir bo‘lgan. Voqea joyidan 55 yoshli ayolning hech qanday zo‘ravonlik alomatlari kuzatilmagan jasadi topilgan. Tergov qo‘mitasi o‘z joniga qasd qilish versiyasini hozircha tasdiqlamagan bo‘lsa ham tekshiruvlarni boshlab yuborgan.
Dastlabki ma’lumotlarga ko‘ra, bolalarning o‘zi onasidan qochib ketgan. Bunga ayol farzandlarini uyda qamab, maktab, kasalxonaga borishiga, atrofdagilar bilan muloqot qilishiga ruxsat bermagani sabab bo‘lgan. Mahalliy prokuratura ta’lim organlari, aholining ijtimoiy himoyasi organlarining, shuningdek, sog‘liqni saqlash va politsiyaning ishini tekshirishga kirishmoqchi.
Gap tikuvchi Dina Azizovaning (boshqa ma’lumotlarga ko‘ra Aliyeva — tahr.) oilasi haqida ketmoqda. Nashrning yozishicha, ayol uzoq yillardan buyon (9—11 yil oralig‘ida) “qamoq”da saqlangan bolalari qochib ketgach, uyni o‘zi yoqib yuborib, joniga qasd qilgan. Bu vaqtda esa ayolning qizlari va o‘g‘li politsiyada bo‘lgan.
Azizova turmush o‘rtog‘i bilan 2000-yillar boshida O‘zbekistondan ko‘chib kelgan. Oilada jami to‘rt nafar farzand bo‘lgan. Ularning to‘ng‘ichi — 33 yoshli Dilyora hozirda Tataristonda yashaydi. Ikki yil oldin bolalarning otasi ishlash uchun Kurgan viloyatiga jo‘nab ketib, oilasi bilan aloqalarini uzgan. Ayolning o‘zi uyda tikuvchilik bilan shug‘ullangan.
Oilaning yashash sharoiti yaxshi bo‘lgan. Onasining yig‘gan pullariga uy sotib olishgan. Mahalla nozirining so‘zlariga ko‘ra, tekshiruvlar vaqtida hech qanday shikoyat bo‘lmaganligi sabab ularning uyiga hech kim kirmagan. Qo‘shnilar ham hech shikoyat qilmagan. Keyinroq ma’lum bo‘lishicha, ular hatto ayolning farzandlari borligini bilishmagan ham.
Ikki qizi va o‘g‘lini o‘qitish bilan Azizovaning o‘zi shug‘ullangan. 2008-yildan buyon ular haqida biror ma’lumot bo‘lmagan. Kenja farzandi 11 oylik bo‘lganida patronaj xizmati ko‘rsatilgan, xolos. Oilaning otasi va to‘ng‘ich qizi tez-tez qarindosh-urug‘lari bilan gaplashib turgan. Ona bolalar maktabga borayotganini aytib kelgan. Kiyim-kechak va ovqatlarni Azizovaning faqat o‘zi olib kelgan.
Ayol nima sababdan farzandlarini uzoq yillar yashirib kelgani ma’lum emas. Versiyalardan biriga ko‘ra, u ruhiy nosog‘lom bo‘lgan. Azizova qizlari va o‘g‘liga “dunyo juda yomon” va “u yerda yomon odamlar ko‘p” deb tushuntirib kelgan.
Azizovaning 20 yoshli qizi Darina onasi bilan janjallashib qolgan va kaltaklangan. Shunda qiz ukasi va singlisini olib internetdagi tanishining yordami bilan qochib ketgan.
Aniqlanishicha, u onasidan yashirin ravishda mobil telefon orqali u bilan yozishib turgan. Darinaning ta’kidlashicha, onasi uyda yo‘q bo‘lganida u tanishi bilan uchrashib ham turgan. Oilaning to‘ng‘ich qizi Dilyoraning so‘zlariga ko‘ra, erkakning yoshi 30 da bo‘lib, Darina bilan ancha yillardan buyon tanish bo‘lishiga, vaziyatdan boxabar bo‘lishiga qaramay hech qanday chora ko‘rmagan.
Natijada Azizovaning farzandlarini politsiyachilar topib olgan, biroq ular uyiga qaytishni istamagan. Ularni oilaning to‘ng‘ich qizi va otasi olib ketishga tayyor. Biroq bolalarning fuqaroligi va hujjatlari yo‘q.
Izoh (0)