Parij shahrida UNESCO 40-yubiley sessiyasining tantanali ochilish marosimi bo‘lib o‘tdi, deb xabar bermoqda Turizmni rivojlantirish davlat qo‘mitasi.
Unda BMT va UNESCO rahbariyati bilan bir qatorda Tojikiston, Serbiya, Estoniya, Latviya, Syerra-Leone va Mali prezidentlari, Armaniston, Andorra, Malta, Tunis kabi 14 davlat va hukumat delegatsiyalari ishtirok etdi. O‘zbekistondan sessiya ishida Bosh vazir o‘rinbosari Aziz Abduhakimov boshchiligidagi delegatsiya qatnashmoqda.
Anjumanning ochilishida BMT Bosh kotibi Antoniu Gutterish chiqish qilib, u asosan insoniyat oldida turgan muhim chaqiriqlar hamda ularning yechimini topish uchun har tomonlama hamkorlik aloqalarini mustahkamlashning ahamiyatiga to‘xtaldi.
BMT Bosh kotibi tashkilotga a’zo mamlakatlarni jagonning hozirgi muammolari yechimini topish uchun hamkorlikni mustahkamlashda ko‘p tomonlama diplomatiyaning rolini aniq anglab yetishga chaqirdi. Uning so‘zlariga ko‘ra, bu ma’noda inklyuzivlikni ta’minlash, ya’ni xalqaro tashkilotlarning nafaqat davlatlar, balki global moliyaviy institutlar, xususiy sektor va shaharlar bilan aloqalarini kengaytirish alohida ahamiyatga ega.
Sessiya 13-noyabr kuni o‘z ishini boshladi. Anjumanning asosiy tadbiri umumsiyosiy debatlar bo‘lib, unda delegatsiyalar rahbarlari, jumladan, O‘zbekiston delegatsiyasi rahbari o‘z ma’ruzasi bilan chiqish qilmoqda.
Izoh (0)