Ijtimoiy tarmoqlarda fuqaroning sobiq prokuratura xodimidan qarzini ololmayotgani haqidagi murojaati tarqaldi. Bosh prokuratura vaziyatga oydinlik kiritdi

Bosh prokuratura tomonidan internet ijtimoiy tarmoqlarida fuqaro M.Akbarova tomonidan e’lon qilingan videomurojaat o‘rganildi.

Unga ko‘ra, M.Akbarova huquqni muhofaza qiluvchi organlardan prokuratura xodimi Shavkat Rahmatullayevdan 19 ming AQSh dollari miqdordagi pullarini qaytarib olib berishni so‘ragan.

Aniqlanishicha, JIB Yangiyo‘l tuman sudining hukmiga ko‘ra, O‘zbekiston Respublikasi Jinoyat kodeksining 168-moddasi 1-qismi bilan sudlangan Shavkat Rahmatullayevdan jabrlanuvchi M.Akbarova foydasiga 13 ming AQSh dollari undirish haqidagi ijro hujjatiga asosan 2019-yil mart oyida Majburiy ijro byurosi Yangiyo‘l shahar bo‘limi tomonidan 13,8 million so‘m undiruvchi M.Akbarovaga tilxat asosida topshirilgan.

Shuningdek, Bosh prokuraturaning aralashuvi bilan joriy yilning aprel oyida qarzdordan undiruvchi M.Akbarovaning talabiga asosan 13 ming AQSh dollari hozirgi kundagi davlat kursi bo‘yicha hisoblanib, ilgari qoplangan 13,8 million so‘mdan qolgan 96 million so‘m pul mablag‘lari undirilib, undiruvchi M.Akbarovaga tilxat asosida topshirilgan va ijro hujjati ijrosi amalda to‘liq ta’minlangan.

Fuqaro Shavkat Rahmatullayev haqiqatda 2000-yilga qadar prokuratura organlari tizimida ishlab kelib, Bosh prokurorning buyrug‘iga asosan prokuratura organlaridan bo‘shatilgan.