Ижтимоий тармоқларда фуқаронинг собиқ прокуратура ходимидан қарзини ололмаётгани ҳақидаги мурожаати тарқалди. Бош прокуратура вазиятга ойдинлик киритди

Бош прокуратура томонидан интернет ижтимоий тармоқларида фуқаро М.Акбарова томонидан эълон қилинган видеомурожаат ўрганилди.

Унга кўра, М.Акбарова ҳуқуқни муҳофаза қилувчи органлардан прокуратура ходими Шавкат Раҳматуллаевдан 19 минг АҚШ доллари миқдордаги пулларини қайтариб олиб беришни сўраган.

Аниқланишича, ЖИБ Янгийўл туман судининг ҳукмига кўра, Ўзбекистон Республикаси Жиноят кодексининг 168-моддаси 1-қисми билан судланган Шавкат Раҳматуллаевдан жабрланувчи М.Акбарова фойдасига 13 минг АҚШ доллари ундириш ҳақидаги ижро ҳужжатига асосан 2019 йил март ойида Мажбурий ижро бюроси Янгийўл шаҳар бўлими томонидан 13,8 миллион сўм ундирувчи М.Акбаровага тилхат асосида топширилган.

Шунингдек, Бош прокуратуранинг аралашуви билан жорий йилнинг апрель ойида қарздордан ундирувчи М.Акбарованинг талабига асосан 13 минг АҚШ доллари ҳозирги кундаги давлат курси бўйича ҳисобланиб, илгари қопланган 13,8 миллион сўмдан қолган 96 миллион сўм пул маблағлари ундирилиб, ундирувчи М.Акбаровага тилхат асосида топширилган ва ижро ҳужжати ижроси амалда тўлиқ таъминланган.

Фуқаро Шавкат Раҳматуллаев ҳақиқатда 2000 йилга қадар прокуратура органлари тизимида ишлаб келиб, Бош прокурорнинг буйруғига асосан прокуратура органларидан бўшатилган.