O‘zbekiston Oliy Majlisi Qonunchilik palatasida 2019-yil 6-noyabr kuni o‘tkazilgan navbatdagi “Hukumat soati”da “Mamlakatda axborot texnologiyalari va kommunikatsiyalarini rivojlantirish borasida amalga oshirilayotgan ishlar samaradorligi va mavjud muammolar hamda ularning yechimlari to‘g‘risida”gi masala ko‘rib chiqildi. Bu haqda Qonunchilik palatasi axborot xizmati xabar berdi.
Deputatlar savollariga Axborot texnologiyalari va kommunikatsiyalarini rivojlantirish vaziri Shuhrat Sodiqov javob qaytardi.
Tadbirda axborot texnologiyalari va kommunikatsiyalarini rivojlantirish borasida amalga oshirilayotgan ishlar, sohaga jalb etilayotgan investitsiyalar, xorijiy sarmoyalarni davlat-xususiy sherikchilik asosida o‘zlashtirishni ta’minlash, axborot texnologiyalari sektorining mamlakat yalpi ichki mahsulotidagi ulushini oshirish bo‘yicha ko‘rilayotgan chora–tadbirlar, mobil aloqa va Internet tarmog‘iga ulanish xizmatlari sifatini yaxshilash, narxlarini optimallashtirish yuzasidan qilinayotgan ishlar hamda istiqboldagi rejalar xususida batafsil axborot berildi.
“Kun.uz”ning yozishicha, Toshkent shahrida tez tibbiy yordam xizmati faoliyatiga axborot-kommunikatsiya texnologiyalarini joriy etish ishlari doirasida shahar tez tibbiy yordam xizmatidagi Damas mashinalari to‘liq zamonaviy Ford mashinalariga almashtiriladi.
AKT vaziri Shuhrat Sodiqovning ma’lum qilishicha, bugungi kunda umumiy qiymati 12 million dollariga teng shartnoma imzolangan. Shu paytgacha to‘qqizta zamonaviy tez tibbiy yordam avtomashinasi olib kelingan bo‘lib, yil oxiriga qadar jami 150 ta ana shunday avtomashina yetkazib berilishi kutilmoqda.Vazirning so‘zlariga ko‘ra, keyingi bosqichda vazirlik tomonidan butun respublika bo‘yicha tez tibbiy yordam texnik uskunalarini qayta modernizatsiya qilish ishlari amalga oshiriladi.
Yig‘ilishda qayd etilishicha, AKT sohasida o‘tgan to‘qqiz oy mobaynida jami 7,9 trillion so‘mlik xizmatlar ko‘rsatilgan. Telekommunikatsiya tarmoqlarini yanada rivojlantirish yo‘nalishida operator va provayderlar tomonidan amalga oshirilgan keng ko‘lamli ishlar natijasida xalqaro internet tarmog‘iga ulanishning umumiy o‘tkazuvchanlik qobiliyati soniyasiga 1 200 gigabitni, foydalanilayotgan sig‘imi esa soniyasiga 650 gigabitni tashkil etgan bo‘lib, yil boshiga nisbatan 48,1 foizga o‘sgan.
Shuningdek, ijtimoiy infratuzilma obyektlarining internet xizmatlaridan foydalanish imkoniyati ko‘rsatkichlari mamlakatdagi barcha ijtimoiy infratuzilma obyektlarining soniga olib qaraganda juda past bo‘lib, mazkur ko‘rsatkichlarni keskin oshirish uchun zarur chora-tadbirlarni ishlab chiqib, amalga oshirish yuzasidan takliflar berildi. Bunda internet xizmatlaridan foydalanish imkoniyati xalq ta’limi tizimida 31 foiz, maktabgacha ta’lim tizimida 29 foiz va tibbiyot muassasalarida 31 foiz ekanligi qayd etilgan.
Izoh (0)