Ijtimoiy tarmoqlarda Buxoro viloyatida paxta terimi bilan bog‘liq ikki YTH sodir bo‘lgani haqida tarqalgan xabarlar yuzasidan Buxoro viloyat IIB munosabat bildirdi. Tarqalgan xabarlarda Buxoroda zobit mashinasida yonib ketgani, hasharchi to‘la avtobus zovurga ag‘darilgani aytilgan.
Buxoro viloyat IIB matbuot xizmatiga ko‘ra, 29-oktabr kuni soat 21:00 da yo‘l transport hodisasi sodir bo‘lib, ichki ishlar xodimi voqea joyida vafot etgan.
Ma’lumotga ko‘ra, 1985-yilda tug‘ilgan mayor Shohidbek Jumayev Olot tuman IIB JQB tezkor vakili lavozimida ishlagan. U shu kuni IIB rahbariyatidan ruxsat olib, yashash uyiga qaytayotib, o‘zining boshqaruvidagi Nexia-3 rusumli, avtomashinasida M-37-yo‘lining “Qorako‘l—Buxoro” yo‘nalishida harakatlangan.
Kechki payt, yo‘l qorong‘uligida yo‘lning 295-kilometriga yetganida, shu yo‘ldan harakatlanib borayotgan Jondor tumani “Xumin” MFYda yashovchi, fermer xo‘jaligi traktorchisi, 1988-yilda tug‘ilgan Ilyos Rahmatov boshqaruvidagi “TTZ-80.10” markali traktorning tirkamasiga orqa tomondan kelib kuchli zarb bilan urilgan. Oqibatda Nexia-3 avtomashinasida yong‘in kelib chiqqan va haydovchi Shohidbek Jumayev voqea joyida vafot etgan.
“Mazkur holat yuzasidan Jinoyat Kodeksining 266-moddasi, 2-qismi bilan jinoyat ishi qo‘zg‘atilib, yo‘l transport hodisasining kelib chiqish sabablarini aniqlash bo‘yicha ekspertizalar tayinlandi. Hozirda Jondor tumani prokuraturasi tomonidan tergov harakatlari va viloyat IIB tomonidan xizmat tekshiruvi o‘tkazilmoqda”, — dedi “Daryo”ga viloyat IIB matbuot xizmati rahbari Quvvat Yarashov.
Keyingi avtotransport hodisasi esa 28-oktabr kuni soat 18:50 da Jondor tumani 4R 225-sonli yo‘lning “Chorzona—Moxonko‘l” yo‘nalishi 2-kilometrida sodir bo‘lgan. Matiz avtomashinasi egasi Madamin To‘xtayev yo‘l harakati qoidalarining buzib, qarama-qarshi yo‘nalishda harakatlangan. Oqibatda fuqaro To‘xta Shirinov boshqaruvidagi “PAZ 672m” rusumli avtobus yo‘nalishiga chiqib, YTH sodir bo‘lishida sababchi bo‘lgan.
“Natijada Matiz avtomashinasi haydovchisi, Jondor tumanidagi fermer xo‘jaligi rahbari Madamin To‘xtevning o‘zi yengil tan jarohati olgan va tuman kasalxonasiga murojaat qilgan. Hozirda kasalxonadan chiqqan, ahvoli qoniqarli. Biroq, ijtimoiy tarmoqlarda yoritilganidek, fuqaro boshqaruvidagi avtobus old qismi bilan zovurga kirib qolgan, ammo, ag‘darilmagan. Shuningdek, mazkur yo‘lovchitrans avtobus hech qanday paxta hasharchilarini tashish xizmatiga jalb qilinmagan. Vaholanki, avtobusda haydovchidan boshqa hech kim bo‘lmagan va haydovchi tan jarohati olmagan. Avtomashina egalari tomonidan sodir bo‘lgan ikki avtohalokat ham paxta terimi bilan bog‘liq emas. Bu holatlarga oydinlik kiritildi”, — deydi Buxoro viloyati IIB matbuot xizmati boshlig‘i Quvvat Yarashov.
Mazkur holat yuzasidan Jondor tumani IIB huzuridagi Tergov guruhi tomonidan tergovga qadar tekshiruv harakatlari olib borilib, Matiz haydovchisi Madamin To‘xtevga nisbatan Ma’muriy javobgarlik to‘g‘risidagi kodeksning 133-moddasi bilan to‘plangan hujjatlar qonuniy chora ko‘rish uchun Jondor tuman Ma’muriy sudiga taqdim etilgan.
Izoh (0)