Ўзбекистон Олий Мажлиси Қонунчилик палатасида 2019 йил 6 ноябрь куни ўтказилган навбатдаги «Ҳукумат соати»да «Мамлакатда ахборот технологиялари ва коммуникацияларини ривожлантириш борасида амалга оширилаётган ишлар самарадорлиги ва мавжуд муаммолар ҳамда уларнинг ечимлари тўғрисида»ги масала кўриб чиқилди. Бу ҳақда Қонунчилик палатаси ахборот хизмати хабар берди.
Депутатлар саволларига Ахборот технологиялари ва коммуникацияларини ривожлантириш вазири Шуҳрат Содиқов жавоб қайтарди.
Тадбирда ахборот технологиялари ва коммуникацияларини ривожлантириш борасида амалга оширилаётган ишлар, соҳага жалб этилаётган инвестициялар, хорижий сармояларни давлат-хусусий шерикчилик асосида ўзлаштиришни таъминлаш, ахборот технологиялари секторининг мамлакат ялпи ички маҳсулотидаги улушини ошириш бўйича кўрилаётган чора–тадбирлар, мобил алоқа ва Интернет тармоғига уланиш хизматлари сифатини яхшилаш, нархларини оптималлаштириш юзасидан қилинаётган ишлар ҳамда истиқболдаги режалар хусусида батафсил ахборот берилди.
«Kun.uz»нинг ёзишича, Тошкент шаҳрида тез тиббий ёрдам хизмати фаолиятига ахборот-коммуникация технологияларини жорий этиш ишлари доирасида шаҳар тез тиббий ёрдам хизматидаги Damas машиналари тўлиқ замонавий Ford машиналарига алмаштирилади.
АКТ вазири Шуҳрат Содиқовнинг маълум қилишича, бугунги кунда умумий қиймати 12 миллион долларига тенг шартнома имзоланган. Шу пайтгача тўққизта замонавий тез тиббий ёрдам автомашинаси олиб келинган бўлиб, йил охирига қадар жами 150 та ана шундай автомашина етказиб берилиши кутилмоқда.Вазирнинг сўзларига кўра, кейинги босқичда вазирлик томонидан бутун республика бўйича тез тиббий ёрдам техник ускуналарини қайта модернизация қилиш ишлари амалга оширилади.
Йиғилишда қайд этилишича, АКТ соҳасида ўтган тўққиз ой мобайнида жами 7,9 триллион сўмлик хизматлар кўрсатилган. Телекоммуникация тармоқларини янада ривожлантириш йўналишида оператор ва провайдерлар томонидан амалга оширилган кенг кўламли ишлар натижасида халқаро интернет тармоғига уланишнинг умумий ўтказувчанлик қобилияти сониясига 1 200 гигабитни, фойдаланилаётган сиғими эса сониясига 650 гигабитни ташкил этган бўлиб, йил бошига нисбатан 48,1 фоизга ўсган.
Шунингдек, ижтимоий инфратузилма объектларининг интернет хизматларидан фойдаланиш имконияти кўрсаткичлари мамлакатдаги барча ижтимоий инфратузилма объектларининг сонига олиб қараганда жуда паст бўлиб, мазкур кўрсаткичларни кескин ошириш учун зарур чора-тадбирларни ишлаб чиқиб, амалга ошириш юзасидан таклифлар берилди. Бунда интернет хизматларидан фойдаланиш имконияти халқ таълими тизимида 31 фоиз, мактабгача таълим тизимида 29 фоиз ва тиббиёт муассасаларида 31 фоиз эканлиги қайд этилган.
Изоҳ (0)