Toshkentda YPX inspektorlari bodi-kameralarni sinovdan o‘tkazmoqda (video)

Toshkent shahrida YPX inspektorlari bodi-kameralarni test rejimida sinovdan o‘tkazish ishlarini amalga oshirmoqda. Sinov davomida kameralar turli ob-havo sharoitlarida, turli ko‘rinishlarda, har xil holatlarda va vaziyatlarda ishlatib ko‘riladi. Bu haqda O‘zbekiston Ichki ishlar vazirligi xabar berdi.

O‘zbekistonda YPX inspektorlarining bodi-kameralar bilan xiznat olib borishi Vazirlar Mahkamasining “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi qaroriga asosan belgilangan. Unga ko‘ra, 2020-yil 1-yanvardan boshlab haydovchilar bodi-kamerasi bo‘lmagan YPX inspektoriga hujjatlarni taqdim etmaslik huquqiga ega. Inspektorlar esa bodi-kamerasiz o‘z xizmat faoliyatini olib borishi mumkin emas.

Mobil videokamera bilan ishlash jarayonida xodim yo‘l harakati qatnashchisini to‘xtatganidan keyin uning oldiga borishi, o‘zini tanishtirishi, lavozimi, unvoni, familiyasi haqida ma’lumot berishi kerak. Haydovchining talabiga ko‘ra inspektor ko‘krak nishon belgisini ma’lum qilishi va xizmat guvohnomasini ochiq holda ko‘rsatishi kerak. Eng muhimi, yo‘l harakati qatnashchilariga mobil videokameradan foydalanayotganini ma’lum qilishi va kelgusida noqonuniy xatti-harakatlar sodir etsa, aybini isbotlash uchun undagi video yozuvdan foydalanishi mumkinligi haqida ogohlantirishi lozim.

Sinov tekshiruvlarida aniqlangan kamchiliklar esa kameralarni ishlab chiqaruvchilariga yetkazildi va bartaraf etiladi. Shuningdek, ma’lumotlarni saqlash qurilmalari, dasturiy ta’minot ham sinovdan o‘tkaziladi.