O‘zbekistondan Qirg‘izistonga 2019-yilda eksport qilinayotgan meva-sabzavot miqdori bo‘yicha ikki mamlakat statistika idoralari ma’lumotlari keskin farq qilmoqda. Bunga East Fruit nashri e’tibor qaratdi.
East Fruit nashri mazkur ko‘rsatkichga e’tibor qaratdi va uni Qirg‘iziston Davlat statistika qo‘mitasining 2019-yil yanvar—avgust oylari bo‘yicha hisoboti ma’lumotlari bilan taqqosladi.
O‘zbekiston Davlat statistika qo‘mitasi tomonidan 2019-yil yanvar—avgust oylarida Qirg‘izistonga 267,5 million dollarlik meva-sabzavot eksport qilingani haqida ma’lumot berilgan. Biroq Qirg‘iziston statistika idorasining ma’lumotlariga ko‘ra, mazkur davr mobaynida O‘zbekistondan 19,9 million dollarlik meva va yong‘oq, 6,2 million dollarlik sabzavot, umumiy hisobda 26,1 million dollarlik meva-sabzavot import qilingan. Ikki mamlakat statistika idoralari ma’lumotlaridagi summalar farqi 10 barobarni tashkil qilmoqda. Shu tariqa, O‘zbekistondan Qirg‘izistonga eksport qilinayotgan meva-sabzavotning qolgan qismi qayerga ketayotgani so‘roq ostida qolmoqda.
O‘zbekiston statistika idorasining hisobotiga ko‘ra, Qirg‘iziston mazkur ko‘rsatkich bilan birinchi marta O‘zbekstondan eng ko‘p meva-sabzavot import qiluvchi davlatga aylangan.
So‘nggi besh yilda O‘zbekstondan meva-sabzavot import qilishda yetakchilik qilgan Qozog‘iston 222,5 million dollar bilan ikkinchi o‘ringa tushgan. Uning ulushi 23,2 foizni tashkil etgan.
O‘zbekiston meva-sabzavotining Rossiyaga yetkazib berilishi uchun yaratilgan “yashil yo‘lak”ka qaramasdan, mazkur davlatning O‘zbekiston meva-sabzavoti eksportidagi ulushi pasayishda davom etmoqda.
Izoh (0)