Toshkent shahrida tez tibbiy yordam xizmatidagi Damas mashinalari to‘liq zamonaviy Ford mashinalariga almashtirilshi haqida xabar berilgan edi.
Sog‘liqni saqlash vazirligi tomonidan ma’lum qilinishicha, 11,9 million dollar qiymatidagi “Toshkent shahrida tez tibbiy yordam xizmati faoliyatiga zamonaviy axborot-kommunikatsiya texnologiyalarini joriy etish” loyihasi doirasida Xitoyning Henan Costar Group kompaniyasi tomonidan zamonaviy axborot kommunikatsiya texnologiyalari va tibbiy asbob-uskunalar bilan jihozlangan 150 ta Ford rusumli tez tibbiy yordam reanimobili O‘zbekistonga yetkazib beriladi.
Hozirda dastlabki to‘qqizta avtomobil yetkazib berilgan. Yil yakuniga qadar yana 141 ta tez tibbiy yordam avtomobili olib kelinishi rejalashtirilgan.
Xabar berilishicha, ushbu tez tibbiy yordam avtomobillarining salon qismiga zamonaviy videokuzatuv kamerasi o‘rnatilgan bo‘lib, bu shifokor tomonidan masofadan (call-markazdan) ahvoli og‘ir bemorlar uchun kerakli maslahat va tegishli ko‘rsatmalar berish imkoniyatini yaratadi.
Shuningdek, Huawei kompaniyasi bilan 155 million dollar qiymatidagi “Respublikaning barcha hududlarida tez tibbiy yordam xizmati faoliyatiga zamonaviy axborot-kommunikatsiya texnologiyalarini joriy etish” loyihasini amalga oshirish maqsadida xitoylik hamkorlar bilan kerakli mablag‘larni jalb etish bo‘yicha muzokalar olib borilmoqda. Loyiha doirasida respuiblikaning barcha hududlarida tez tibbiy yordam xizmati call-markazlarini zamonaviy AKT bilan jihozlash va mavjud tez tibbiy yordam transporti avtoparkini yangilash rejalashtirilgan.
Zamonaviy call-markazlari ishga tushirilishi bilan ham qator muammolar bartaraf etiladi. Ayni paytda Respublika shoshilinch tibbiy yordam ilmiy markazining Toshkent shahar tez tibbiy yordam stansiyasining call-markazida joriy ta’mirlash ishlari yakuniga yetkazilib, Henan Costar Group kompaniyasi tomonidan yetkazib berilgan zamonaviy axborot-kommunikatsiya texnologiyalari uskunalarini o‘rnatish ishlari yakunlanmoqda.
Shuningdek, avtomatlashtirilgan tez tibbiy yordam xizmati boshqaruv tizimi sinov tarzida joriy etilib, hozirda mazkur tizimdan foydalanadigan xodimlarni o‘qitish ishlari boshlanmoqda. Joriy yilning 1-dekabridan boshlab Toshkent shahrida ushbu tizim to‘liq ishga tushiriladi.
Bundan tashqari, keyingi bosqichda mobil ilovalar ishlab chiqiladi. Bunda bemorning o‘zi bevosita planshet yoki telefon orqali murojaat qilish imkoniyatiga ega bo‘ladi. Bu yangiliklar bosqichma-bosqich yo‘lga qo‘yilmoqda.
Bu kabi qulayliklar tufayli har bir chaqiriqni qayta ishlash uchun bir daqiqadan kam vaqt sarflanadi. Natijada tezkorlikka erishiladi. Aholiga malakali va zamonaviy tibbiy xizmat ko‘rsatish imkoniyati yanada ortadi, deyiladi vazirlik xabarida.
Izoh (0)