Toshkent viloyati Toshkent tumani, Nizomiy-Ganjaviy ko‘chasidagi “Do‘nya Paranda” MChJga qarashli tovuq fermasida 6-noyabr kuni yong‘in sodir bo‘ldi. Davlat yong‘in xavfsizligi xizmatining yozishicha, hodisa haqida yong‘in-qutqaruv xizmatiga soat 04:32 da xabar kelib tushgan.
Voqea joyiga 6 ta yong‘in o‘chirish bo‘linmasi jalb etilgan. Birinchi bo‘linmalar chaqirilgan manzilga 8 daqiqada yetib borgan. Ko‘rilgan tezkor harakatlar natijasida yong‘in soat 05:03 da qurshab olinib, soat 06:03 da to‘liq bartaraf etilgan.
Tan jarohati olgan va halok bo‘lgan insonlar yo‘q. Biroq, yong‘in haqida alanga maydoni kengayib ketgandan so‘ng yong‘in-qutqaruv xizmatiga xabar berilgani uchun birinchi yong‘in o‘chirish bo‘linmalari voqea joyiga yetib borganda, ferma binosi to‘liq ochiq alanga bilan yonayotganligi ma’lum bo‘lgan.
Hodisa oqibatida tovuq fermasining 250 kvadrat metr maydonda tomi, shifti, ichki qismi yonib zararlangan hamda 150 dan ortiq tovuq nobud bo‘lgan. Yong‘in elektr simlarida yuzaga kelgan qisqa tutashuv oqibatida yuzaga kelgan, deb taxmin qilinmoqda.
Esalatib o‘tamiz, 24-oktabr kuni Samarqanddagi parrandachilik fermasida yuz bergan yong‘inda qariyb 8 mingta jo‘ja yonib ketgandi.
Izoh (0)