Тошкент вилояти Тошкент тумани, Низомий-Ганжавий кўчасидаги «Дўня Паранда» МЧЖга қарашли товуқ фермасида 6 ноябрь куни ёнғин содир бўлди. Давлат ёнғин хавфсизлиги хизматининг ёзишича, ҳодиса ҳақида ёнғин-қутқарув хизматига соат 04:32 да хабар келиб тушган.
Воқеа жойига 6 та ёнғин ўчириш бўлинмаси жалб этилган. Биринчи бўлинмалар чақирилган манзилга 8 дақиқада етиб борган. Кўрилган тезкор ҳаракатлар натижасида ёнғин соат 05:03 да қуршаб олиниб, соат 06:03 да тўлиқ бартараф этилган.
Тан жароҳати олган ва ҳалок бўлган инсонлар йўқ. Бироқ, ёнғин ҳақида аланга майдони кенгайиб кетгандан сўнг ёнғин-қутқарув хизматига хабар берилгани учун биринчи ёнғин ўчириш бўлинмалари воқеа жойига етиб борганда, ферма биноси тўлиқ очиқ аланга билан ёнаётганлиги маълум бўлган.
Ҳодиса оқибатида товуқ фермасининг 250 квадрат метр майдонда томи, шифти, ички қисми ёниб зарарланган ҳамда 150 дан ортиқ товуқ нобуд бўлган. Ёнғин электр симларида юзага келган қисқа туташув оқибатида юзага келган, деб тахмин қилинмоқда.
Эсалатиб ўтамиз, 24 октябрь куни Самарқанддаги паррандачилик фермасида юз берган ёнғинда қарийб 8 мингта жўжа ёниб кетганди.
Изоҳ (0)