Bir necha kun avval Toshkent shahar hokimligi Abdulla Qodiriy nomidagi istirohat bog‘i hududida mehmonxona qurish bo‘yicha yapon kompaniyasi bilan kelishuvga erishgani ma’lum bo‘lgandi.
Ushbu qaror ijtimoiy tarmoqlarda keng muhokamalarga sabab bo‘ldi. Aksariyat ijtimoiy tarmoqlar foydalanuvchilari ushbu qarorni qoraladi.
Xususan, bloger Farhodjon Chinberdiyev bog‘ hududida mehmonxona qurilishini “ahmoqona qaror” deb atadi.
Uning aytishicha, bu mehmonxona istalgan boshqa joyda, masalan, hokimlikda ishlaydigan va shu yechimni qabul qilgan mas’ul shaxslarning mahallasida, yangi qurilayotgan biror turar joy o‘rnida yoki “Chorsu” mehmonxonasi o‘rnida qurilishi mumkin.
“Lekin shaharda yashaydigan odamlarga tegishli umumiy joyni olib, biznesga berish juda ham kutilmagan va kalta o‘ylangan qaror”, — deydi u va shunday qo‘shimcha qilgan:
“Odamlar uchun sayr qiladigan, dam oladigan, o‘zlarini yaxshi his qiladigan yashil hududlarni ko‘paytirish lozim. Shu mehmonxona o‘rniga attraksionsiz biror kichik bog‘ bilan favvora qo‘yilishi shu atrofda yashaydigan odamlarga ancha yordam bergan bo‘lardi. Mehmonxona sifatida xususiy hududga aylantirish Abdulla Qodiriy ko‘chasidagi tirbandlikni yanada murakkablashtiradi”.
5-noyabr, seshanba kuni Toshkent shahar hokimligi “Abdulla Qodiriy majmuasi”da amalga oshirilayotgan loyiha va bunyodkorlik ishlari bo‘yicha ma’lumot berdi.
Loyihaga ko‘ra, Abdulla Qodiriy bog‘i hududida Qodiriy nomidagi ijod maktabi va zamonaviy kutubxona barpo etiladi, adibning haykali o‘rnatiladi, shuningdek, adib yashagan xonadon va uning atrofida ham hozirda rekonstruksiya va obodonlashtirish ishlari olib borilayotgan bo‘lib, bu joyda Abdulla Qodiriy uy-muzeyi tashkil etiladi.
Sanab o‘tilgan ishlarni amalga oshirish uchun 60 milliard so‘mdan ziyod mablag‘ talab etiladi, jumladan, uy-muzey uchun — 12 milliard so‘m, maktab va haykal uchun — 40 milliard so‘m, hudud atrofidagi xonadonlarni ko‘chirishga kompensatsiya uchun — 10 milliard so‘m ko‘zda tutilgan.
Abdulla Qodiriy nomini abadiylashtirish, uning nomidagi majmua va uy-muzeyni zamonaviy talablar va milliy an’analar asosida barpo etishga qaratilgan loyihani amalga oshirish natijasida hozirda deyarli e’tibordan chetda qolgan hududda “Abdulla Qodiriy majmuasi” timsolida etnobog‘ va etnoshaharcha barpo etiladi.
Mazkur loyihani amalga oshirish uchun davlat budjetidan mablag‘ ajratilishi ko‘zda tutilmagan.
Loyihaga ko‘ra, bog‘ning bir qismida Abdulla Qodiriy yashagan davr ruhi aks etgan etnoshaharcha tashkil qilinadi. Qolgan qismi esa rejalashtirilgan bunyodkorlik va yuqori sifatda obodonlashtirish uchun bino va mehmonxona barpo etish maqsadida investorlarga investitsion shartlar bilan taklif etilmoqda.
Ushbu shart orqali kelib tushgan mablag‘lar yuqorida ko‘rsatilgan kutubxona, maktab, haykal, uy-muzeyni qurish, yuqori sifatdagi obodonlashtirish ishlarini amalga oshirish va ko‘chirilayotgan xonadonlar uchun kompensatsiya to‘lash maqsadlarida sarflanadi.
Izoh (0)