Бир неча кун аввал Тошкент шаҳар ҳокимлиги Абдулла Қодирий номидаги истироҳат боғи ҳудудида меҳмонхона қуриш бўйича япон компанияси билан келишувга эришгани маълум бўлганди.
Ушбу қарор ижтимоий тармоқларда кенг муҳокамаларга сабаб бўлди. Аксарият ижтимоий тармоқлар фойдаланувчилари ушбу қарорни қоралади.
Хусусан, блогер Фарҳоджон Чинбердиев боғ ҳудудида меҳмонхона қурилишини «аҳмоқона қарор» деб атади.
Унинг айтишича, бу меҳмонхона исталган бошқа жойда, масалан, ҳокимликда ишлайдиган ва шу ечимни қабул қилган масъул шахсларнинг маҳалласида, янги қурилаётган бирор турар жой ўрнида ёки «Чорсу» меҳмонхонаси ўрнида қурилиши мумкин.
«Лекин шаҳарда яшайдиган одамларга тегишли умумий жойни олиб, бизнесга бериш жуда ҳам кутилмаган ва калта ўйланган қарор», — дейди у ва шундай қўшимча қилган:
«Одамлар учун сайр қиладиган, дам оладиган, ўзларини яхши ҳис қиладиган яшил ҳудудларни кўпайтириш лозим. Шу меҳмонхона ўрнига аттраксионсиз бирор кичик боғ билан фаввора қўйилиши шу атрофда яшайдиган одамларга анча ёрдам берган бўларди. Меҳмонхона сифатида хусусий ҳудудга айлантириш Абдулла Қодирий кўчасидаги тирбандликни янада мураккаблаштиради».
5 ноябрь, сешанба куни Тошкент шаҳар ҳокимлиги «Абдулла Қодирий мажмуаси»да амалга оширилаётган лойиҳа ва бунёдкорлик ишлари бўйича маълумот берди.
Лойиҳага кўра, Абдулла Қодирий боғи ҳудудида Қодирий номидаги ижод мактаби ва замонавий кутубхона барпо этилади, адибнинг ҳайкали ўрнатилади, шунингдек, адиб яшаган хонадон ва унинг атрофида ҳам ҳозирда реконструкция ва ободонлаштириш ишлари олиб борилаётган бўлиб, бу жойда Абдулла Қодирий уй-музейи ташкил этилади.
Санаб ўтилган ишларни амалга ошириш учун 60 миллиард сўмдан зиёд маблағ талаб этилади, жумладан, уй-музей учун — 12 миллиард сўм, мактаб ва ҳайкал учун — 40 миллиард сўм, ҳудуд атрофидаги хонадонларни кўчиришга компенсация учун — 10 миллиард сўм кўзда тутилган.
Абдулла Қодирий номини абадийлаштириш, унинг номидаги мажмуа ва уй-музейни замонавий талаблар ва миллий анъаналар асосида барпо этишга қаратилган лойиҳани амалга ошириш натижасида ҳозирда деярли эътибордан четда қолган ҳудудда «Абдулла Қодирий мажмуаси» тимсолида этнобоғ ва этношаҳарча барпо этилади.
Мазкур лойиҳани амалга ошириш учун давлат бюджетидан маблағ ажратилиши кўзда тутилмаган.
Лойиҳага кўра, боғнинг бир қисмида Абдулла Қодирий яшаган давр руҳи акс этган этношаҳарча ташкил қилинади. Қолган қисми эса режалаштирилган бунёдкорлик ва юқори сифатда ободонлаштириш учун бино ва меҳмонхона барпо этиш мақсадида инвесторларга инвестицион шартлар билан таклиф этилмоқда.
Ушбу шарт орқали келиб тушган маблағлар юқорида кўрсатилган кутубхона, мактаб, ҳайкал, уй-музейни қуриш, юқори сифатдаги ободонлаштириш ишларини амалга ошириш ва кўчирилаётган хонадонлар учун компенсация тўлаш мақсадларида сарфланади.
Изоҳ (0)