5-noyabr kuni soat 02:23 da Andijon viloyati Asaka tumani Ulug‘bek MFY Saxiylik ko‘chasida joylashgan Uz-Dong Won AJ qo‘shma korxonasida yong‘in sodir bo‘ldi, deb xabar berdi O‘zbekiston FVV YOXBB OAV bilan hamkorlik qilish bo‘linmasi.
Xabar asosida voqea joyiga 3 ta yong‘in o‘chirish bo‘linmalari jalb etilgan.
Bo‘linmalar chaqirilgan manzilga uch daqiqada yetib borgan. Ko‘rilgan tezkor harakatlar natijasida yong‘in soat 02:29 da o‘rab olinib, 02:37 da bartaraf etilgan. Yong‘indan korxonaning 150 kvadrat metr maydoni saqlab qolingan.
Tan jarohati olganlar va halok bo‘lganlar qayd etilmagan. Yong‘in oqibatida korxonaning ovqat tayyorlash xonasi 20 kvadrat metr maydonda yonib zararlangan.
“Yong‘inning taxminiy sababi qozonda yog‘ni dog‘lash uchun qo‘yib, nazoratsiz qoldirilishi. Moddiy zarar miqdori aniqlanmoqda”, — deyiladi xabarda.
Ma’lumot uchun, Uz-Dong Won AJ qo‘shma korxonasi 1996-yilda avtomobillari uchun butlovchi qismlar va detallarni ishlab chiqarishni mahalliylashtirish maqsadida tashkil etilgan.
Korxonaning asosiy faoliyati Asaka avtomobil zavodida ishlab chiqariladigan avtomobillar uchun glushitellar, zarbaga qarshi eshik to‘sinlari va kuzov detallarini ishlab chiqarishdan iborat.
25-oktabr kuni ijtimoiy tarmoqlarda Andijon viloyatidagi Asaka avtomobil zavodida yong‘in yuzaga kelgani haqida xabarlar tarqaldi. UzAuto Motors matbuot xizmati Asaka avtomobil zavodi hududida hech qanday yong‘in yuz bermaganini ma’lum qildi.
Izoh (0)