Ўзбекистон Республикаси Олий Мажлиси Сенати раиси Танзила Норбоева Қозоғистонга ташрифи доирасида мамлакат президенти Қосим-Жўмарт Тўқаев билан учрашди. Бу ҳақда Ўзбекистон Сенати ахборот хизмати хабар берди.
Мавзуга доир: Танзила Норбоеванинг Қозоғистонга ташрифи бошланди
Қозоғистон раҳбари Танзила Норбоеванинг ташрифи парламентлараро алоқаларни ривожлантириши ва давлатлараро муносабатларга қўшимча туртки бериши туфайли катта аҳамиятга эга эканлигини таъкидлади.
«Қозоғистон ва Ўзбекистон ўзаро ҳамкорликни ривожлантиришдан манфаатдор бўлибгина қолмай, балки қатор масалаларда бир-бирини тўлдириб туради. Шунинг учун муваффақият қозонишимиз муқаррар. Боз устига, биз ҳамкасбим Ўзбекистон Президенти Шавкат Мирзиёев билан ҳар жабҳада ҳамкорликни ривожлантириш учун фаол ҳаракат қилишга келишиб олганмиз», — деди Қосим-Жўмарт Тўқаев.
Қозоғистон президенти 2018 йилда икки мамлакат ўртасидаги савдо ҳажми 2,5 миллиард долларга етганлигига ва шу йилнинг тўққиз ойи давомида ўтган йилги кўрсаткичдан ошиб кетганлигига урғу берди.
Ўз навбатида, Танзила Норбоева илиқ кутиб олганлиги учун миннатдорлик билдирди ва Ўзбекистон Президенти Шавкат Мирзиёевнинг табрик сўзини етказди. Сенат раҳбари Қосим-Жўмарт Тўқаевнинг давлат раҳбари лавозимига сайланиши унинг аввалги лавозимда тажрибали дипломат, обрў-эътиборли раҳбар ва энг асосийси, Қозоғистонда давлатчиликни мустаҳкамлаш, хавфсизликни таъминлаш ва иқтисодиётни ривожлантириш йўлида кучли сиёсат олиб борган биринчи президент Нурсултон Назарбоев ғояларини давом эттирувчи шахс сифатидаги фаолиятининг эътирофи эканлигини таъкидлади.
Ўзбекистон Олий Мажлиси Сенати раиси Ўзбекистонда жорий йил Қозоғистон йили ўтказилиши муносабати билан амалга оширилаётган кенг кўламли тадбирларни халқлар яқинлашишига ёрқин мисол қилиб келтирди. Танзила Норбоева Қозоғистон президенти Қосим-Жўмарт Тўқаевнинг Ўзбекистонга биринчи давлат ташрифи ҳам мамлакатлар ўртасидаги ўзаро ҳамкорликни янада фаоллаштиришга туртки берганлигини таъкидлади.
Учрашув давомида томонлар юксак даражада эришилган келишувлар ижросининг боришини ва кенг кўламли икки томонлама ҳамкорликнинг бошқа масалаларини муҳокама қилди. Шунингдек, минтақавий ва халқаро кун тартибидаги долзарб мавзулар юзасидан ҳам фикр алмашилди.
Изоҳ (0)