O‘zbekiston parlamenti delegatsiyasining Qozog‘istonga rasmiy tashrifining ikkinchi kuni “Otan Qorg‘aushilar” haykali poyiga gul qo‘yish marosimidan boshlandi, deb xabar beradi Senat axborot xizmati.
Ushbu majmua ko‘p millatli Qozog‘istonning barcha xalqlari birligini nazarda tutadi.
So‘ngra O‘zbekiston Oliy Majlisi Senati raisi Tanzila Norboyevaning Qozog‘iston parlamenti Senati raisi Darig‘a Nazarboyeva bilan uchrashuvi bo‘lib o‘tdi. Uchrashuvda keng ko‘lamli masalalar muhokama etildi.
O‘zaro samarali hamkorlik va ishonch prinsiplari asosida Qozog‘iston hamda O‘zbekiston o‘rtasida rivojlanayotgan do‘stona munosabatlarni tilga olib, Tanzila Norboyeva O‘zbekiston rahbariyati barcha sohalarda ikki tomonlama hamkorlikni mustahkamlashga alohida e’tibor berayotganligini ta’kidladi.
“2017—2019-yillarda O‘zbekiston va Qozog‘iston iqtisodiy hamkorligi strategiyasining izchil bajarilishi ikki mamlakat strategik manfaatlarining umumiyligiga asoslangan o‘zaro foydali va samarali hamkorlikni boyitishga xizmat qildi. O‘zbekistonda Qozog‘iston kapitali ishtirokida 733 ta korxona faoliyat ko‘rsatmoqda. 2019-yil yanvar—sentabr oylari davomida o‘zaro savdo hajmi 2,6 milliard AQSh dollarini tashkil etdi va 23,2 foizga oshdi, shuningdek, transport va tranzit tashish sohasi sezilarli rivojlanmoqda”, — dedi Tanzila Norboyeva.
Parlamentlararo munosabatlar haqida so‘z borganda O‘zbekiston Oliy Majlisi Senati raisi ikki tomonlama hamkorlikni qonunchilik nuqtayi nazaridan ta’minlash bo‘yicha birgalikda olib boriladigan bo‘lajak ishlar muhimligiga urg‘u berdi. Bunda qonun ijodkorligi yuzasidan tajriba almashish uchun hamkorlik bo‘yicha parlament guruhlarining va parlamentlar tegishli qo‘mitalarining salohiyatidan amaliy foydalanish taklif etildi. Uchrashuv davomida xalqaro parlament tuzilmalari doirasida o‘zaro hamkorlikni mustahkamlash masalalari muhokama etildi.
Qozog‘iston Parlamenti Senati raisi Darig‘a Nazarboyeva o‘z nutqida O‘zbekiston Markaziy Osiyoda Qozog‘istonning muhim strategik hamkori ekanligini ta’kidladi.
“Bugun Qozog‘iston va O‘zbekiston o‘rtasidagi munosabatlar barcha sohalarda ildam rivojlanmoqda. Bunda Qozog‘istonning birinchi prezidenti — elboshi Nursulton Nazarboyev va O‘zbekiston Prezidenti Shavkat Mirziyoyev xizmati asosiy o‘rin tutadi”, — dedi Qozog‘iston Senati raisi.
Qozog‘iston Senati rahbari qayd etganidek, Qosim-Jo‘mart To‘qayev davlat rahbari sifatida o‘zining ikkinchi xorijiy tashrifini aynan O‘zbekistonga amalga oshirdi va bu munosabatlarni o‘zaro anglashuv hamda yaqin qo‘shnichilik ruhida mustahkamlashni davom ettirishga sodiqlikning yana bir isbotidir, deyiladi xabarda.
Uchrashuv doirasida “2019—2020-yillarda O‘zbekiston Oliy Majlisi Senati va Qozog‘iston Parlamenti Senati o‘rtasida parlamentlararo hamkorlikni rivojlantirish bo‘yicha amaliy tadbirlar rejasi (Yo‘l xaritasi) imzolash marosimi bo‘lib o‘tdi.
Qozog‘iston Parlamenti Senati raisining taklifiga binoan, 2019-yil 4-noyabr kuni O‘zbekiston Respublikasi Oliy Majlisi Senati raisi Tanzila Norboyeva boshchiligidagi Senat delegatsiyasi Qozog‘istonga rasmiy tashrif bilan bordi.
Izoh (0)