Toshkent davlat iqtisodiyot universiteti rektori Bahodir Xodiyev ishdan olindi. Bu haqda bloger Xushnud Xudoyberdiyev o‘zining Telegram-kanalida ma’lum qildi.
“Bugun, Prezident maslahatchilari Sherzod Kudbiyev va Abdujabbor Abduvohidov hamda DXX, prokuratura organlari vakillari boshchiligida o‘tkazilgan yig‘ilishda oliy ta’lim muassasalari uyg‘onishi zarur ekanligi, bundan buyon qabul jarayonidan boshlab bitirish jarayoniga qadar ochiqlik va oshkoralik tamoyillari asosiy bo‘lishi, bunga qarshi chiqqanlarga esa qat’iy jazo ko‘rilishi ta’kidlandi.
Buning birinchi isboti sifatida TDIU rektori Bahodir Xodiyev lavozimidan ozod etildi. Buning ortidan ‘Narxoz’da katta tozalash ishlari ham amalga oshirilishi ta’kidlandi”, — deyiladi xabarda.
Bahodir Xodiyev 1960-yili Toshkent shahrida tug‘ilgan. 1982-yilda Toshkent xalq xo‘jaligi institutini “Iqtisodiy ma’lumotlarga ishlov berishni tashkil etish” mutaxassisligi bo‘yicha tamomlagan. Iqtisod fanlari doktori, professor. 2000-yilda “O‘zbekiston iqtisodiyotida tadbirkorlikni rivojlantirishni ekonometrik modellashtirish” mavzusida doktorlik dissertatsiyasini himoya qilgan. 2016-yilning mayidan buyon Toshkent davlat iqtisodiyot universiteti rektori lavozimida ishlab kelayotgandi.
Izoh (0)