Toshkent davlat iqtisodiyot universiteti rektori lavozimiga Oliy va o‘rta maxsus ta’lim vazirining birinchi o‘rinbosari Kongratboy Sharipov tayinlandi. Bu haqda huquqshunos va bloger Xushnudbek Xudoyberdiyev xabar berdi.
“Kongratboy Sharipov ilgari Toshkent shahridagi Turin politexnika universiteti rektori sifatida juda muvaffaqiyatli ish olib borgan va universitetda sifatli ta’lim tizimi yaratishda katta mehnat qilgan mutaxassis sifatida ko‘pchilikka ma’lum”, — deyiladi xabarda.
Avvalroq Toshkent davlat iqtisodiyot universiteti rektori Bahodir Xodiyev ishdan olingani haqida xabar berilgan edi.
“Bugun, Prezident maslahatchilari Sherzod Kudbiyev va Abdujabbor Abduvohidov hamda DXX, prokuratura organlari vakillari boshchiligida o‘tkazilgan yig‘ilishda oliy ta’lim muassasalari uyg‘onishi zarur ekanligi, bundan buyon qabul jarayonidan boshlab bitirish jarayoniga qadar ochiqlik va oshkoralik tamoyillari asosiy bo‘lishi, bunga qarshi chiqqanlarga esa qat’iy jazo ko‘rilishi ta’kidlandi.
Buning birinchi isboti sifatida TDIU rektori Bahodir Xodiyev lavozimidan ozod etildi. Buning ortidan ‘Narxoz’da katta tozalash ishlari ham amalga oshirilishi ta’kidlandi”, — deyiladi xabarda.
Izoh (0)