Асакадаги UzAuto Motors автомобиллари учун эҳтиёт қисмлари ишлаб чиқарувчи корхонада ёнғин юз берди

5 ноябрь куни соат 02:23 да Андижон вилояти Асака тумани Улуғбек МФЙ Сахийлик кўчасида жойлашган Uz-Dong Won АЖ қўшма корхонасида ёнғин содир бўлди, деб хабар берди Ўзбекистон ФВВ ЁХББ ОАВ билан ҳамкорлик қилиш бўлинмаси.

Хабар асосида воқеа жойига 3 та ёнғин ўчириш бўлинмалари жалб этилган.

Бўлинмалар чақирилган манзилга уч дақиқада етиб борган. Кўрилган тезкор ҳаракатлар натижасида ёнғин соат 02:29 да ўраб олиниб, 02:37 да бартараф этилган. Ёнғиндан корхонанинг 150 квадрат метр майдони сақлаб қолинган.

Тан жароҳати олганлар ва ҳалок бўлганлар қайд этилмаган. Ёнғин оқибатида корхонанинг овқат тайёрлаш хонаси 20 квадрат метр майдонда ёниб зарарланган.

«Ёнғиннинг тахминий сабаби қозонда ёғни доғлаш учун қўйиб, назоратсиз қолдирилиши. Моддий зарар миқдори аниқланмоқда», — дейилади хабарда.

Маълумот учун, Uz-Dong Won АЖ қўшма корхонаси 1996 йилда автомобиллари учун бутловчи қисмлар ва деталларни ишлаб чиқаришни маҳаллийлаштириш мақсадида ташкил этилган.

Корхонанинг асосий фаолияти Асака автомобиль заводида ишлаб чиқариладиган автомобиллар учун глушителлар, зарбага қарши эшик тўсинлари ва кузов деталларини ишлаб чиқаришдан иборат.

25 октябрь куни ижтимоий тармоқларда Андижон вилоятидаги Асака автомобиль заводида ёнғин юзага келгани ҳақида хабарлар тарқалди. UzAuto Motors матбуот хизмати Асака автомобиль заводи ҳудудида ҳеч қандай ёнғин юз бермаганини маълум қилди.