Toshkent viloyatining Bekobod shahrida yashovchi Bekzod Jo‘rayev va Shoira Jo‘rayeva xonadonida joriy yilning 21-sentabr kuni to‘rt egizak — ikki o‘g‘il va ikki qiz dunyoga keldi. Bu haqda “O‘zmetkombinat” matbuot xizmati “Daryo”ga ma’lum qildi.
Ma’lum qilinishicha, Bekzod Jo‘rayev O‘zbekiston metallurgiya kombinatining Texnologik jarayonlarning avtomatlashtirilgan boshqaruv tizimlari laboratoriyasida muhandis bo‘lib ishlaydi. Uning rafiqasi Shoira Jo‘rayeva esa “Donata Farma” mas’uliyati cheklangan jamiyatida kichik xodim sifatida faoliyat olib boradi.
“O‘zmetkombinat” AJ tomonidan Jo‘rayevlar oilasiga alohida e’tibor qaratildi. Kombinatdan bu oilaga Bekobod shahrining 14-dahasidan xonadon sovg‘a qilindi.
4-noyabr, dushanba kuni Jo‘rayevlar oilasiga bu uyni tantanali topshirish marosimi bo‘lib o‘tdi. Marosimda “O‘zmetkombinat” AJ boshqaruvi raisi Tohirjon Azamatov, Bekobod shahar hokimi Zafar Fayzullayev so‘zga chiqdi. Ular Jo‘rayevlar oilasini to‘rt egizak tug‘ilganligi bilan yana bir bor qutladi.
Tantanali marosimda kombinat boshqaruvi raisi Tohirjon Azamatov Bekzod Jo‘rayevga uch xonali uy kalitini topshirdi. Shuningdek, egizaklar — Hasan, Husan va Fotima, Zuhraning sog‘lom ulg‘ayishi uchun ularning ota-onasiga zarur bo‘lgan anjomlar va uy-ro‘zg‘or buyumlari ham sovg‘a qilindi.
Xabar berilishicha, mazkur oilada to‘rt egizak tug‘ilishi ma’lum bo‘lgach, Shoira Jo‘rayeva turar joyidagi tibbiyot muassasasida nazoratga olingan. Homiladorlikning oxirgi oyida esa Bekobod shahridan Respublika Perinatal markazining homiladorlar patologiyasi bo‘limiga o‘tkazilgan.
Ma’lumot uchun, 2019-yilda Jizzax, Xorazm, Buxoro, Qashqadaryo viloyatlarida tug‘ilgan uch egizaklarga Shavkat, Miromon va Mirziyo ismlari, Farg‘onada tug‘ilgan uch egizakka esa Shavkatjon, Ziroatxon va Saidaxon, Buxoroda tug‘ilgan uch egizakka Shavkat, Mirziyo va Saida ismlari qo‘yilgan edi. Buxoroda tug‘ilgan Shavkat, Miromon va Mirziyoning otasiga Prezident nomidan Cobalt, Qashqadaryoda tug‘ilgan Shavkat, Miromon va Mirziyolarning otasiga esa Spark berilgan edi. 2018-yilda esa Andijon, Qo‘qon va Toshkentda Shavkat, Miromon va Mirziyolar dunyoga kelgan edi. Andijonlik egizaklarning otasiga Spark, qo‘qonlik va toshkentlik egizaklarning otalariga esa Cobalt sovg‘a qilingan. 2017-yilda esa Xorazm, Qoraqalpog‘iston va Buxoroda tug‘ilgan uch egizaklarga Shavkat, Miromon, Mirziyo ismlari qo‘yilgan.
Izoh (0)