Тошкент вилоятининг Бекобод шаҳрида яшовчи Бекзод Жўраев ва Шоира Жўраева хонадонида жорий йилнинг 21 сентябрь куни тўрт эгизак — икки ўғил ва икки қиз дунёга келди. Бу ҳақда «Ўзметкомбинат» матбуот хизмати «Дарё»га маълум қилди.
Маълум қилинишича, Бекзод Жўраев Ўзбекистон металлургия комбинатининг Технологик жараёнларнинг автоматлаштирилган бошқарув тизимлари лабораториясида муҳандис бўлиб ишлайди. Унинг рафиқаси Шоира Жўраева эса «Доната Фарма» масъулияти чекланган жамиятида кичик ходим сифатида фаолият олиб боради.
«Ўзметкомбинат» АЖ томонидан Жўраевлар оиласига алоҳида эътибор қаратилди. Комбинатдан бу оилага Бекобод шаҳрининг 14-даҳасидан хонадон совға қилинди.
4 ноябрь, душанба куни Жўраевлар оиласига бу уйни тантанали топшириш маросими бўлиб ўтди. Маросимда «Ўзметкомбинат» АЖ бошқаруви раиси Тоҳиржон Азаматов, Бекобод шаҳар ҳокими Зафар Файзуллаев сўзга чиқди. Улар Жўраевлар оиласини тўрт эгизак туғилганлиги билан яна бир бор қутлади.
Тантанали маросимда комбинат бошқаруви раиси Тоҳиржон Азаматов Бекзод Жўраевга уч хонали уй калитини топширди. Шунингдек, эгизаклар — Ҳасан, Ҳусан ва Фотима, Зуҳранинг соғлом улғайиши учун уларнинг ота-онасига зарур бўлган анжомлар ва уй-рўзғор буюмлари ҳам совға қилинди.
Хабар берилишича, мазкур оилада тўрт эгизак туғилиши маълум бўлгач, Шоира Жўраева турар жойидаги тиббиёт муассасасида назоратга олинган. Ҳомиладорликнинг охирги ойида эса Бекобод шаҳридан Республика Перинатал марказининг ҳомиладорлар патологияси бўлимига ўтказилган.
Маълумот учун, 2019 йилда Жиззах, Хоразм, Бухоро, Қашқадарё вилоятларида туғилган уч эгизакларга Шавкат, Миромон ва Мирзиё исмлари, Фарғонада туғилган уч эгизакка эса Шавкатжон, Зироатхон ва Саидахон, Бухорода туғилган уч эгизакка Шавкат, Мирзиё ва Саида исмлари қўйилган эди. Бухорода туғилган Шавкат, Миромон ва Мирзиёнинг отасига Президент номидан Cobalt, Қашқадарёда туғилган Шавкат, Миромон ва Мирзиёларнинг отасига эса Spark берилган эди. 2018 йилда эса Андижон, Қўқон ва Тошкентда Шавкат, Миромон ва Мирзиёлар дунёга келган эди. Андижонлик эгизакларнинг отасига Spark, қўқонлик ва тошкентлик эгизакларнинг оталарига эса Cobalt совға қилинган. 2017 йилда эса Хоразм, Қорақалпоғистон ва Бухорода туғилган уч эгизакларга Шавкат, Миромон, Мирзиё исмлари қўйилган.
Изоҳ (0)