Zafar Hoshimov O‘zbekistonda ochilishi rejalashtirilgan Carrefour supermarketlar tarmog‘i haqida fikr bildirdi

“Korzinka.uz” tarmog‘i asoschisi Zafar Hoshimov Toshkentda o‘z giper va supermarketini ochmoqchiligini ma’lum qilgan Carrefour fransuz brendi haqidagi fikrlari bilan bo‘lishdi.

“Biz ularni kutayotgan edik. Carrefour tarmog‘ining O‘zbekistonga kelishi biz uchun juda ko‘p yaxshi yangiliklar va qiziqarli lahzalarni taqdim etadi.

Birinchidan, xalqaro darajadagi bu kabi qatnashchilarning mamlakatimiz chakana savdo tarmog‘iga qiziqish bildirishi bu mamlakatimizda ushbu sohaning rivojlanayotganidan dalolat beradi. Iste’mol bozoriga bunday qiziqish va tan olish ma’lum bir ijobiy tarzda bu sohada lider bo‘lgan “Korzinka.uz” tarmog‘i kapitalizatsiyasiga ta’sir qiladi.

Bozor uchun bu iste’molchilarga tovarlarni sotish va reklama qilish, tanlov va xilma-xillikning ko‘payishi uchun yangi formatlar va kanallarning paydo bo‘lishini anglatadi. Bularning barchasi zamonaviy savdo bazasini va mijozlar bazasini kengaytiradi. Bularning barchasi bozorning barcha ishtirokchilariga foyda keltiradi,” — deb yozadi Hoshimov.

Tadbirkor shuningdek o‘zining raqobatdan qo‘rqmasligini ham ma’lum qildi:

“30 milliondan ortiq iste’molchisi bor bozor uchun zamonaviy onlayn chakana savdo sektori hali ham rivojlanmagan. Faqatgina poytaxtning o‘zida yalpi iste’mol mahsulotlarining 9 foizdan kamrog‘i chakana savdo do‘konlari hissasiga to‘g‘ri keladi. Umuman olganda, mamlakatda bu ko‘rsatkich yanada past. Taqqoslash uchun qo‘shni Qozog‘istonda bu ko‘rsatkich 45 foizdan oshadi, Rossiyada esa bu ko‘rsatkich 75 foizdan oshdi. Yevropa va AQShda bu ko‘rsatkich 90 foizga yaqin.

Bizning bozorimizda o‘sishi uchun sharoit bor va bozorning to‘yinishiga hali ancha bor. Hozirda bitta asosiy raqobatchimiz bor — bozor va uyushmagan savdo do‘konlari. Biz yangi raqobatchilarni samimiy kutib olamiz, ayniqsa u keltiradigan vositalar va bilimlarning barchasi biz uchun ham foydali bo‘ladi”.

Ma’lumot uchun, Carrefour savdo do‘konlari O‘zbekistonda Akfa Group bilan hamkorlikda ochilish rejalashtirilgan.

Birinchi bosqichda yettita, shu jumladan, 2020-yilda uchta supermarket va bitta gipermarket, 2021-yilda esa ikkita supermarket va bitta gipermarket ochish rejalashtirilmoqda. Ular Akfa Group’ga tegishli umumiy maydoni 17,4 ming kvadrat metr bo‘lgan obyektlarda joylashadi.