Namangan shahri “Zarbdor” MFY Beshkapa 3-berk ko‘chasida joylashgan uchta qo‘shni uylarda yong‘in sodir bo‘ldi. Davlat yong‘in xavfsizligi xizmatining ma’lum qilishicha, hodisa haqida yong‘in-qutqaruv xizmatiga 30-oktabr, chorshanba kuni soat 19:54 da xabar kelib tushgan.
Voqea joyiga 5 ta yong‘in o‘chirish texnikasi jalb etilgan. Birinchi bo‘linmalar ko‘rsatilgan manzilga 8 daqiqada yetib borgan. Ko‘rilgan tezkor harakatlar natijasida yong‘in soat 20:06 da qurshab olingan va 21:02 da to‘liq bartaraf etilgan.
Tan jarohati olganlar va halok bo‘lganlar qayd etilmagan. Yong‘in oqibatida 9-uyning 12 kvadrat metr maydonda, 10-uyning 70 kvadrat metr maydonda va 3-uyning 10 kvadrat metr maydonda tom qismlari yonib zararlangan. Yong‘indan uylarning jami 500 kvadrat metr maydoni saqlab qolingan.
Yong‘inning qo‘shni binolarga tarqalishiga uylarni qurishda yong‘inga qarshi oraliq masofalar inobatga olinmaganligi va yong‘inga qarshi devorlar qurilmaganligi sabab bo‘lgan. Hodisaning sababi va moddiy zarar miqdori aniqlanmoqda.
Bundan avval Toshkentda to‘rt qavatli uyning tom qismining 70 kvadrat metr maydoni yonib ketgani haqida xabar berilgandi.
Izoh (0)