O‘zbekistonda avtomobillarning shovqinini o‘lchaydigan moslama yo‘q. Shu bois sershovqin mashinalar jarimaga tortilmayapti

Ichki ishlar vazirligida avtotransport vositalaridan chiqadigan kuchli ovoz (shovqin)ni o‘lchaydigan moslama mavjud emas. Bu haqda 31-oktabr kuni IIV Yo‘l harakati xavfsizligi bosh boshqarmasi (YHXBB) mutasaddilari bilan bo‘lib o‘tgan ochiq muloqotda ma’lum qilindi, deya xabar bermoqda “Daryo” muxbiri Musulmonbek Ibrohimov.

IIV YHXBB boshlig‘i o‘rinbosari polkovnik Erali Bozorovning aytishicha, avtotransport vositalaridan chiqadigan shovqin — juda dolzarb masala va bu borada Ekologiya va atrof muhitni muhofaza qilish davlat qo‘mitasi bilan hamkorlikda bir yilda ikki bor “Toza havo” tadbiri o‘tkaziladi.

Ochig‘ini aytish kerak, bizda avtomashinalardan chiqayotgan ovozni o‘lchash moslamasi mavjud emas. Ekologiya qo‘mitasida ham bunday uskuna yo‘qligi ma’lum bo‘ldi. Vaholanki, shovqin darajasi belgilangan me’yordan ortiq bo‘lgan, motori “gurillab” turadigan mashinalardan foydalanish taqiqlangan.

Muammo shuki, ovozni o‘lchash moslamasi bo‘lmaganidan keyin, shovqinning darajasi qanchalik ekanligini bilmaganimizdan keyin, bu borada qoida buzayotgan haydovchilarga ham biror chora ko‘rolmaymiz. Bu kamchilikni bartaraf etish bo‘yicha Ekologiya qo‘mitasi bilan birgalikda qo‘shma qaror tasdiqlangan.

Erali Bozorov, IIV YHXBB boshlig‘i o‘rinbosari, polkovnik

Ma’lumot uchun, Ma’muriy javobgarlik to‘g‘risidagi kodeksning 127-moddasi uchinchi qismiga ko‘ra, tegishli ruxsat olmay turib transport vositalariga tovush chiqaruvchi qurilmalarni o‘rnatish ana shu qurilmalarni musodara qilib, fuqarolarga eng kam ish haqining bir baravari (223 ming so‘m)dan uch baravari (669 ming so‘m)gacha, mansabdor shaxslarga esa — eng kam ish haqining uch baravari (669 ming so‘m)dan besh baravari (1,11 million so‘m)gacha miqdorda jarima solishga sabab bo‘ladi.